Голосник

Сумар дня на 23. червця/юнія 2020 р.

Приносиме  вам  сумар  медияльной  ґрупы  ЛЕМ.фм+  на ден 23. червця/юнія 2020 р.


Самоуряд для Спадковины

Іщы лем до 30. червця/юнія тырват набір зголошынь до загальнопольского конкурсу, котрый напрявленый єст на вшыткы ґмінны самоуряды, якы взріцьово опікуют ся памятниками. Конкурс «Самоуряд для Спадковины» орґанізуют Міністер Культуры і Нацийональной Спадковины і Ґенеральный Консерватор Памятників. Для выріжненых ґмін зрыхтуваны сут нагороды. Координатор конкурсу – Нацийональный Інститут Спадковины, выпродукує фільм промуючый культурову спадковину лавреата. Додатково зреалізує інформацийну кампанію про выграный самоуряд. Вшыткы лавреаты і выріжнены отримают памятковы таблиці. Конкурс адресуваный є до містецкых, сельско-містецкых або сельскых самоурядів. Жебы взяти участ в конкурсі, ґміны мусят переслати правильні опрацуваный ґмінный проґрам і выказати, што зреалізували діяня цілю охороны і захованя вартости культуровой спадковины. Конкурс подуманый єст, жебы промувати і популяризувати найліпшы приміры опрацовуваня і вводжыня ґмінных проґрамів опікы над памятниками.

Громадяны Европейской Уніі можут свобідні подорожувати

13. червця/юнія більшіст держав Европейской Уніі одкрыло своі внутрішні границі. Громадяны ЕУ можут свобідні подорожувати, без конечности кварантанны. З граничных переходів зникнули постерункы Граничной Стражы, де до того часу проходила санітарна контроля. Ограничыня знесли тіж на повітряных і морскых переходах. Іщы до того вікенду не мож было єднак свобідні переходити границі зо Словацийом. Уряд влады Словацкой Республикы скорше отворил уж своі границі для держав Евросоюзу, але аж тепер, 20. червця/юнія, для громадян польской державы. При въізді на обшыр Словациі не треба вказувати неґативного тесту на присутніст коронавіруса, не обовязує уж і кварантанна. Уряд в Братиславі рекомендує єднак своім громадянам, жебы уникали подорожы на Шлеск, бо епідемічні є то іщы небезпечна обшыр.

Липец з Ґмінныйм Осередокм Культуры в Санковій

Ґмінный Осередок Культуры в Санковій і війт ґміны Санкова просят на третю уж едицию Вакацийного Автомобільного Кіна. І того рока, аж і при пандеміі коронавіруса, орґанізаторы не одпущают і при дотримуваню принципів безпекы просят вшыткых на спільне обзераня образів до Маластова. Каждого тыжня през цілый липец/юлий на офіцийным сайті Ґмінного Осередка Культуры явил ся буде плян з наголовками презентуваных фільмів. Вступ єст безплатный.

Матура з лемківского языка, што было?

Вчера, 22. червця/юнія, одбыла ся матура з лемківского языка. Покля што, не маме потвержденой інформациі што до чысла осіб, котры приступили до еґзаміну. Вчерашня матура з лемківского языка складала ся з двох головных тем, з котрых здаюча особа мала выбрати єдну, цілю опрацуваня. Перша з тем тыкала привязаня до вшыткого, што рідне. В аркушы явил ся фраґмент прозаічного тексту Василя і Мариі Хомів під назвом «Вертаня ку своім коріньом». Друга з головных тем односила ся до тугы за мамом. Задачом было зрыхтувати порівнуючу аналізу і інтерпретацию двох вершів. Першый з них авторства Петра Мурянкы під наголовком «Очы» то глубоко особисты стихы написаны в памят матери. Другій з вершів то твір Михала Нестерака, выдатного літерата молодого поколіня періоду І світовой войны. Верш «Для Тебе, моя Мати», написаный понад столітя тому, треба было зрівнати з рядками написаныма Мурянком перед шістнадцетьома роками. Примірник тогорічной матуры найдете на сайті Центральной Еґзамінацийной Комісиі.

фот. Малопольща

Шеруй.

О авторі

Avatar

Коментарі