Приносиме вам сумар медияльной ґрупы ЛЕМ.фм+ на ден 23. червця/юнія 2023 р.
Дальшы результаты списуваня в Сербіі
Як подала аґентура Рутенпрес, статистичный уряд Сербской Республикы опубликувал дальшы результаты списуваня жытелів 2022 – даны о материньскым языку, віковій структурі населіня і віроісповіданю. Русиньскій язык як материньскій записало в Сербіі 8 725 осіб. Сербскій язык як материньскій записало собі понад 5 607,5 осіб, т.є. 84,4% населіня. Як сме перше інформували, ґу Русинам приголосили ся в Сербіі 11 483 особы. В порівнаню з даныма з 2011 рока єст то о понад 19% менше. Кєд іде о вікову структуру, найвеце Русинів в Сербіі єст в катеґориі од 30 до 49 років, дальшы сут катеґориі од 65 до 84 років і од 50 до 65 років. Діти до 14 років єст 1 280, а молодежы од 15 до 29 років 1 567. Найвеце громадян Сербіі, бо 81% голосит ся ґу православній вірі. Лем 1,1% населіня творят атеісты. Детальнійшы інформациі найдете в дописі на нашым портали.
Тырвают Европескы Ігры Краків – Малопольща 2023
В середу 21. червця/юнія рушыли Европескы Ігры Краків – Малопольща 2023. Змаганя будут проходити до 2. липця/юлия в ріжных містах Малопольщы, м.ін. Кракові, Тарнові, Креници, Закопаным ци Новым Санчы, а тіж інчых містах Польщы, м.ін. во Вроцлаві і в Ряшові. Змаганя сут орґанізуваны на рівни чемпіонату Европы і сут олимпійскыма квалифікациями в выбраных спортах до Олимпійскых Ігр в Парижы 2024. В змаганях в реґіоні возме участ близко 7 тис. спортовців з 48 держав. Єст то для Малопольщы велика шанса на розвиток і промоцию реґіону. В звязку з тырваючыма Европейскыма Іграми можут выступувати утрудніня в дороговым руху. О такых поінформувала м.ін. Крениця, де од днес будут проходити змаганя в гірскым колярстві, джудо і теквондо. До 1. липця/юлия буде закрыта доіздова дорога вздолж Ледовой Галі, а на ул. Домбровского од стороны ул. Пілсудского буде обовязувал рух в єдну страну. Од днес до неділі будут закрыты для загального руху і доіздова дорога до рекреацийных теренів на Парковій Горі, ул. Слонечна і паркінґ на ул. Еберса.
Чешскій амбасадор стрітил ся з підпредседом ПСК
В понедільок 19. червця/юнія новоменуваный чешскій посол на Словациі Рудольф Індрак одвиділ Уряд Пряшівского Самосправного Краю. Посланця гостил підпредседа Пряшівского Самосправного Краю Штефан Бєляк. На стрічы, заміряній на поглубліня взаємных чехо-словацкых односин і розшыріня спілпрацы, были порушены такы темы як підпора активности діти і молодежы, туристичного руху і підниманя атракцийных місц в краю. Чешскій амбасадор недавно выразил і своі односины ґу Русинам – підчас святкувань Дня Русинів Словациі в Братиславі повіл, же Чешскій Дім є і про Русинів. Можете про тото чытати в статі на нашым портали.
Стріча про Лопянку в домі культуры в Тисній
Карпатскє Товариство і Ґмінный Центр Культуры і Еколоґіі в Тисній просят на заран, суботу 24. червця/юнія до дому культуры в Тисній на чергову сесию посвячену Лопянці. Початок о 10.00 год. В проґрамі буде м.ін. про цікавинкы і архівалиі з істориі церкви в Балигороді, осягніня Бєщадского Нацийонального Парку в 50-літя істнуваня, про звыкы і великодні обряды на лемківско-бойківскым пограничы і про русиньскы пісні.