Сумар дня на 23. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 23. серпня/авґуста 2023 р.

Великій герб Русинів

Вчас XVII Світового Конґресу Русинів, якій одбыл ся в Новым Саді (Сербія) в минулый вікенд, делеґаты схвалили великій ерб Карпатскых Русинів. Творит го малый ерб і є дополненый о дальшы знакы з природным мотивом, котры выражают Карпаты, іх фауну і флору. Носителями щыта сут традицийны карпатскы звірята: медвід і волк, стоячы на буковій підставці, котра символизує карпатскы буковы пралісы. Під щытом вине ся пантлик з гослом, котре творят початковы слова русиньского гымну «Я РУСИНЪ БЫЛЪ, ЕСМЬ, И БУДУ», што походят з поезиі «Вручаніє» од Александра Духновича. Слова на пантлику сут написаны автентичном ґраматиком так, як вышли в альманаху «Поздравленіє русинов на год 1851 от літературного заведенія Пряшовскаго», котре упорядкувал Александер Духнович. Великій ерб можете видіти і на нашым портали в статі о результатах Конґресу.

Стежка з Сяр до Рыхвалду

Ґміна Санкова завершат будову пішо-біциґльовой стежкы з Сяр до Рыхалду. Тота понад двокілометрова траса получыт не лем центр ґміны з лемківскым селом Рыхвалд, де видіти мож єдну з церкви зо списку UNESCO, але тіж поправит безпеку жытелів і іх діти, котры дотля узком стежком ходили до школы. Парарельно на тым одтинку інчу інвестицию реализує Ґорлицкій Повіт, котый кладе новый асфальт на дорозі. Будова стежкы є в рамках польско-словацкого проґраму INTERREG. Проєкт веденый є враз з ґміном Бобова і словацкыма єдиницями Стропків і Полянка. Аж 85% фондів походит з Евросоюзу, а лем дальшу част мусіла покрыти Санкова. Подля ґмінных власти стежка буде могла быти оддана до хоснуваня уж о хвилю – початком вересня/септембра, коли зачне ся новый шкільный рік.

Памяти Добряньского

Заран, 24. серпня/авґуста в селі Чертіжне на Пряшівскій Руси одбуде ся святочна подія посвячена єдному з будителів Русинів, Адольфови Добряньскому. В тот ден одкрыта буде різба Добраньского, котрой автором є знаный словацкій академіцкій різбяр Мартін Щепка. Подія одбуде ся на прицерковным теметові, де Добяньскій спочыват. Святочне окдрытя орґанізуют Надація Деревяна Церковка Габура, село Чертіжне і Общаньскє Здружыня Нова Чертеж. Адольф Добряньскій єст єдным з найвыдатнійшых будителів Русинів ХІХ ст., был ершым великым політичным лідером Русинів на Уграх і єдным з основателів Матиці Словеньской в возродным процесі Словаків і Русинів в ХІХ ст.

Кухня Погірян і Лемків

Музей Дворы Карвациянів і Ґладышів рыхтує стрічу з кухньом Погірян і Лемків. Подія одбуде ся 3. вересня/септембра в рамках Европейскых Дни Спадковины. Будут то варштаты і показы традицийной кухні Лемків і Погірян. Стріча пройде в Скансенсі Погіряньского Села в Шымбарку. Вчас єднодньовых варштатів участникы познают давны кулінарны рецептуры з Низкого Бескіду. Буде вказана і принагідна часова выстава посвячена давному нарядю, якє хоснувало ся в кухни вчас варіня/рыхтуваня ідля. Остаючы при темі лемківской кухні, припоминаме, што Стоваришыня «Руска Бурса» в Ґорлицях выдало лемківску кулінарну книжку нп. «Лемківскы Смакы», котру фурт іщы можете придбати в нашым інтернетовым склепі.