Сумар дня на 24. червця/юнія 2024 р.

Приносиме вам сумар медияльной ґрупы ЛЕМ.фм+ на ден 24. червця/юнія 2024 р.

Книжкы з сериі «Бескід без кіту» Мариі Стшелецкой нагороджены в престіжных конкурсах

Як поінформувало выдавництво Libra PL, книжна пн. «Бескід без кіту. Зима» авторства Мариі Стшелецкой нашла ся на пестіжным світовым Почестным Списку IBBY 2024 в катеґориі Ілюстрациі. Створены авторком дереворыты, котры выполнили книжку, были завдякы номінациі од Польской Секциі IBBY доцінены і Медженародном Радом IBBY до справ Книжок для Молодых. Місце акциі нагородженой книжкы то зимова Лемковина в 20. роках ХХ ст. Публикация єст богато ілюструвана одбитками дереворытів, што были вытяты авторком з бескідской зваленой липы. Іщы єдна книжка Мариі Стшелецкой з сериі «Бескід без кіту» была в посліднім часі доцінена в престіжным конкурсі. Послідня част бескідской трилоґіі «Гайда. Бескід без кіту», котра тыкат акциі «Вісла» перемогла в конкурсі Літературна Нагорода столичного міста Варшава в категориі Дітяча Література (текст і ілюстрациі). Як одало в поясніню номінациі жырі конкурсу: «Авторка бесідує з непамятю, вслухує ся в істориі оповіданы бескідскым пейзажом, облікат в тіло тіни Лемків, што мешкали гын перед выселінями. Дозвалят почути любов до місця, котрого єст ся частю – та біль його втраты». Членкынія жырі Аґнєшка Совіньска выголосила вердикт в лемківскым языку. До тогорічной едициі было зголошеных аж 755 книжок, з чого 149 публикаций для діти.

Стоваришыня Маґурыч завершат діяльніст

Як поінформувал Шымон Моджеєвскій зо Стоваришыня Маґурич, в грудни/децембрі тр. хоче завершыти свою діяльніст, што істо означат конец діяльности Маґурича. Покликаный до жытя Шымоном Моджеєвскым Маґурич найчастійше занимат ся забытыма, лишеныма без опікунів цмонтерями в неістнуючых селах. Через послідніх 38 років основатель Шымон Моджеєвскій м.ін. орґанізувал і вюл соспільны ремонтовы працы на цмонтерях, тіж лемківскых, завдякы котрым повело ся выремонтувати понад 3000 крестів, нагробных памятників і капличок з обшыри, на котрых жыли Лемкы, Бойкы, але і Жыды, Полякы, Ромы і Німці.

На торы вертат «Włóczykij» 

Уж в тым тыжни на торы верне вакацийный потяг, котрый лучыт Підкарпатя і Малопольщу, а конкретно Ясло і Креницю. Як подали Малопольскы Желізниці, першый курс з Ясла до Крениці єст заплянуваный на суботу 29. червця/юнія. Так як і в попереднім році – потягы реляциі Ясло-Крениця і Крениця-Мушына-Попрад-Татры будут зо зобом скомунікуваны на стациі Мушына, так што з Ясла мож буде скоро і выгідні доіхати під самы Тарты. Получыня «Włóczykij» было пілотажово одкрыте в 2019 р. Од 2021 р. курсує реґулярно в вакацийным сезоні, а чысло подорожуючых фурт росне. В минулым році з получыня скорыстало близко 7 тис. пасажерів.

XXVII Світ під Кычером

Уж в тоту пятницю рушыт черговый «Світ під Кычером». 27. едиция Медженародного Фольклорного Фестівалю «Світ під Кычером», якій орґанізує ліґницкій Лемківскій Ансамбль Пісні і Танця «Кычера» проходила буде в днях од 28. червця/юнія до 7. липця/юлия. Выступлят ансамблі м.ін. з Іспаніі, Украіны (Ормане), Мексику, Болгариі ци Словациі. Як раз того рока Словацию буде репрезентувал русиньскій ансамбль Маковиця зо Свидника. Другым русиньскым колективом з заграниці буде ансамбль з Руского Керестура з Сербіі. Фестіваль загостит до Олесниці, Лісця, Шпротавы, Польковиц, Ліґниці, Волова, Поляниці – Здрій, Рудной, Замениц і Ліґницкого Поля.