Сумар дня на 24. квітня 2026 р.

Приносиме вам сумар медияльной ґрупы ЛЕМ.фм+ на ден 24. квітня 2026 р.

Богослужыня в памят помордуваных лемківскых, ромскых і польскых діти з Крампной і сусідніх сел

В найблизшу неділю 26. квітня/апріля в парохіяльным костелі в Дошници (давнійше мурувана грекокатолицка церков покровы св. Димитрия) о 14.00 год. одбуде ся богослужыня в памят помордуваных лемківскых, ромскых і польскых діти з Крампной і сусідніх сел. До злочыну дошло понад 80 років тому – 24. квітня/апріля 1943 рока в Новым Змигороді. Тіла помордуваных нацистами діти зложены были в громадным гробі на жыдівскым цмонтері в спомненым місточку. Роками на гробі находила ся блудні зредаґувана таблиця, што жертвами сут незнаны з імена і назвиска жыдівскы діти. Стараньом Здзіслава Сенчака, презеса заряду стоваришыня Християньска Ґміна ім. Леона Карціньского в Новым Змигороді, таблиця буде поправлена. На основі реляций свідків тамтых подій, Здзіслав Сенчак усталил, што серед помордуваных в 1943 році были м.ін. Анна Бернацка, Анна і Миколай Барна, Мария Пырдза, Мария Ґрацонь і інчы. Вшыткы помордуваны діти были каліками.

Вратуйме безцінну стару ікону з церкви в Ждыни

Недавно, підчас консерваторскых прац при іконостасі в забытковій церкви Покровы Пресвятой Богородиці в Ждыни, натрафлено на вынятково цінны стары іконы. Через столітя находили ся они в ждыньскій церкви, єднак были невидимы, будучы частю задньой стороны іконостасу – од стороны олтаря. Іконы перетырвали там близко 400 років. То дві XVII-вічны іконы, створены около 1640 р., походят з деісісного чыну неістнуючого уж іконостасу. То монументальны представліня святых Апостолів, выконаны техніком темперы на дереві, частично срібрены. Іконы сут вынятково великы – іх выміры то аж 1 м х 2,7 м. Обі сут в барз злым стані. Іх краса єст вкрыта під верствами фарбы, дерево пукат, а час помалы одберат ім жытя. Як подал парох ждыньской православной парохіі о. Ярослав Ґрич, в тым році мож вратувати лем єдну з ікон. Парохія отримала дотацию з Міністерства Культуры і Нацийональной Спадковины в квоті 117,5 тис. злотых на консервацию єдной з ікон. Єднак жебы зачати працы, потрібный єст вклад власный, в высокости близко 14,5 тис. злотых. В тым ціли одкрыта была соспільна колекта на сайті pomagam.pl пн. «Ratujmy bezcenną ikonę z XVII w.». Мотузок до колекты

Спільне коруваня жерди на цмонтері в Радоцині

Стоваришыня Долины просит вшыткых любителів Низкого Бескіду до спільного коруваня жeрди, в рамках ремонту огороджыня цмонтеря в Радоцині. Працы будут проходити заран, в суботу 25. квітня/апріля од 10.00 год. Орґанізатор запевят нарядя, воду і перекускы. Дрібниці находят ся в фейсбуковій подіі на профіли Stowarzyszenie Doliny.

Соспільна акция прятаня Высовой

Єдиниці OSP і MDP в Высовій просят вшыткых жытелів до участи в акциі прятаня Высовой. Акция пройде заран, в суботу 25. квітня/апріля, початок о 9.00 год в высівскій пожарничій ремізі. Орґанізатор запевнят рукавиці і мішкы. Ден завершыт ся спільным огниском.