Сумар дня на 24. липця/юлия 2024 р.

Приносиме вам сумар медияльной ґрупы ЛЕМ.фм+ на ден 24. липця/юлия 2024 р.

Будуют каплицю в Розстайным

В неістнуючым селі Розстайне з ініциятивы Михала Хомика ставляна є каплиця. Місце нового сакрального обєкту то церквиско по бывшій грекокатолицкій церкви покровы свв. Космы і Даміана. Не заховала ся єнак нияка фотоґрафія з видом церкви, котру по ІІ світовій войні знищено. Перша церков в Розстайным была вознесена в 1791 році. Згоріла вчас борб 1914 рока. На єй місци поставлено в 1921 році нову, яку розобрано в 1953 році. Невельо видимых слідів остало по мешканцях Розстайного, каплиця має припоминати о присутности гын Лемків. Ділянка, на котрій ведена є будова, належыт до Повітового Староства в Яслі. Цілю поставліня капличкы поле арендували Обєднаню Лемків. Думкодавцьом і фундатором вознесіня капличкы є Михал Хомик, родом з сусідньой Святківкы, а од 36 років жытель Зъєднаных Штатів Америкы.

Власти Міністерства Культуры і Нацийональной Спадковины в Ґорлицях. Бесідували м.ін. о побудуваню Музею І Світовой Войны

В пятницю 19. липця/юлия ґорлицкій Ратуш гостил представничку Міністерства Культуры і Нацийональной Спадковины Марту Цєнковску, котра єст Підесекретарьом Стану в ранзі віцеміністра. Вчас візиты в Ґорлицях Віцеміністра Марта Цєнковска мала нагоду видіти пару місц о історичным значыню. Была в Реґіональным Музею Польского Туристично-Краєзнавчого Товариства, виділа жыдівскій Сидур Прохожых та Воєнный Цмонтір но 91. Стрітила ся бургомайстром міста Ґорлиці Рафалом Кукльом, Лукашом Балаєвичом та директором Ґорлицкого Центра Культуры Янушом Зємбом. Стріча была нагодом запрезентувати богату історию Ґорлиц та омовити пляны, што тыкают будовы Европейского Музею І Світовой Войны. Єдным з пунктів было тіж видіти стан ремонтуваного тепер будинку Ґорлицкого Центра Культуры, котрый завдякы фінансовій підпорі Міністерства Культуры переходит ґрунтовну модернізацию.

Здобуд грошы за пасіня звірят на Твоім поли

Ішы до 30. липця/юлия мож складати внескы до проґраму «Натуральне Підкарпатскє Пасіня». До розділіня є веце як 3,3 млн зл. Проґрам Маршалківского Уряду Підкарпатского Воєвідства обнимат пасіня звірят на луках і паствисках того воєвідства. Бенефіциєнтами можут быти позаурядовы орґанізациі, стоваришыня, кооперативы, костелы, спортовы клюбы і нон-профітовы підприємства. Підметы, котры зголосят ділянку під пасіня звірят, зобовязаны сут представити документ, котрый потверджат право до розпоряджаня польом. Цілю проґраму є екстенсивне пасіня звірят, утриманя зеленых обшыри і підпертя триманя звірят.

Сфотоґрафуй «локальне» Підкарпатя. Выграй 6000 зл

Департамент Культуры і Охороны Нацийональной Спадковины Маршалківского Уряду Підкарпатского оголосил фотоґрафічный конкурс «Підкарпатска Іконосфера». Тогорічном темом на знимкы єст «локальніст» – термін, што односит ся до невеликого простору. Локальніст може обявляти ся в ріжных культуровых контекстах того простору і в заходячых в ним реляциях. Джерела інспірациі можут тыкати простору, комунікациі, економіі, соспільных явиск, вартости ци універсальности стыку локального з ґлобальным. Фотоґрафіі мож присылати до 18. жолтня/октобра. В жырі засідают м.ін. Філіп Спрінґер – писменник і фотоґаф, ци Анна Гартман-Ксиціньска, фотоґрафка. Головна нагорода выносит 6 000 зл.

Фот. jaslo.naszemiasto.pl