Сумар дня на 24. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 24. серпня/авґуста 2021 р.

Ґміна Санкова єдном з найліпшых ґмін в Малопольщы

Департамент Зрівноваженого Розвитку Маршалківского Уряду Малопольского Воєвідства опрацувал рапорт пн. «Европейскы Фундушы в Малопольщы». Тыкат він темы схоснуваня самоурядами середків з унійного буджету в фінансовій перспективі на рокы 2014-2020. На основі тых даных окрислено ґміны з найліпшыма успіхами в Малопольщы, а серед них нашла ся ґміна Санкова. На єй обшыри проведено аж 55 проєктів о вартости блиско 90 млн зл, з чого дофінансуваня з Европейского Фонду выносило 62 млн зл. Як підкрислила Малґожата Малух, війт той ґміны, успіх в позыскуваню унійных середків то ефект тяжкой працы цілого ансамблю. Ціль, яку мают власти ґміны при реализациі проєктів, то будувати інновацийный потенциял ґміны та вводити новы, еколоґічны розвязаня, што разом дозволит піднести стандард жытя жытелів ґміны Санкова.

Книжка «Світ під Кычером» під редакцийом Юрия Стариньского выріжнена 

Знаме уж номінациі до нагороды Ліґницка Книжка Рока 2020. Конкурсова капітула спосеред 34 наголовків выданых минулого рока выбрала 5, в тым книжку «Світ під Кычером», редактором якой єст Юрий Стариньскій, ведучый Лемківского Ансамблю Пісні і Танця «Кычера». Цілю конкурсу єст нагородити та промувати книжкы звязаны з Ліґницьом, написаны жытелями Ліґниці або выданы в тым місті. При выборі номінаций капітула смотрит м.ін. на ґрафічну страну, тему, ориґінальніст ци тото, як дана публикация влинула на жытелів міста, реґіону ци державы. Конкурс орґанізуваный єст Музейом Міди в Ліґници та Ліґницком Публичном Бібліотеком.

Ґорлицкій ратуш буде ремонтуваный. Што ся змінит?

Уряд Міста Ґорлиці оголосил конкурс оферт на одновліня ґорлицкого Ратуша. Оферты мож складати до 26. серпня/авґуста. Пляново працы мают ся завершыти перед кінцьом будучого рока. Ремонт поділеный буде на три етапы. В першым достосуют будинок для осіб з неполносправностями, бесіда о будові ліфта і получыню обох будинків ратуша. Другій етап то термоізоляция, одновліня елевациі і конструкциі даху, на котрым замонтуют фотовольтаіку. На конец проведена буде выміна внутрішньой інсталяциі, центрального огріваня і климатизациі.

Ремонт в Устю Рускым перенесеный

Недавно інформували сме, же ближыт ся ремонт єдного з устяньскых мостів, котрый находит ся на трасі з Ґладышова до Устя Руского, над ріком Ждынянком. Ремонт ся опізнит і згідні з новом датом зачне ся аж 6. вересня/септембра. Не повело ся тіж ввести обізду через ріку, так як хотіли того жытелі ґміны, зато на початку прац будут обовязувати скорше вызначены трасы – єдена через Шквіртне і Ганчову, друга Кункову, Лося і Климківку.

«Церкви в полудньово-східній Польщы» – сакральны обєкты очами Каміля Палюшка

Вказал ся авторскій альбом Каміля Палюшка пн. «Церкви в полудньово-східній Польщы». Публикация представлят фотоґрафіі церкви од Шляхтовой через Бескіды, Бєщады, Погіря по Розточа і Любельщыну. Містит блиско 500 стран, на якых презентує ся 200 сакральных обєктів і вступ написаный Ярославом Ґємзом і Даміяном Новаком. Альбом мож купити на сайті Выдавництва Лібра або безпосередньо од автора.

фот. Gorlice24