Сумар дня на 24. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 24. серпня/авґуста 2023 р.

Знаме проґрам тогорічного Свята Меду і Вина

Як заявил Містецкій Уряд в Пшемкові, тогорічне XXIII Нижньошлезскє Свято Меду і Вина в Пшемкові одбуде ся в днях 23.-24. вересня/септембра. Проґрам зачне ся в суботу. Офіцийне одкрытя свята заплянувано в тот ден на 15.00 год. На вечер передвиджено першы концерты. Неділя зачне ся Божеском Літургійом в пшемківскій грекокатолицкій церкви, вчас котрой окрем грекокатолицкого пароха участ возмут православный і римокатолицкій парохы з Пшемкова, як крайовы душпастырі пчолярів. Традицийом пшемківского свята є, што недільна літургія служена є каждого рока в інчым храмі Пшемкова. Того рока головна молитва одбуде ся як раз в грекокатолицкій церкви. О 15.00 год. на сцені выступит ЛАПіТ Ластівочка. То не конец лемківской культуры, кєд же на вечер запрезентує ся іщы Секция Рапу, котру можете знати хоц бы з Лемківской Ватры на Чужыні. Секцию творят молоды Лемкы, якы при тым рапуют і по лемківскы.

Інтеґрацийна стріча при любіньскій православній парохіі

Православна парохія Святой Тройці в Любіні рыхтує інтеґрацийну стрічу для діти і молодежы, яка одбуде ся уж 2. вересня/септембра. Буде то подія Братства Православной Молодежы, якє діє при місцевій парохіі. В проґрамі передвижено м.ін. гры і інтеґрацийны забавы, выклады, варштаты, конкурсы і спортовы змаганя. Не бракне і дачого смачного до іджыня. Стріча зыйде ся такой з початком шкільного рока, коли то школярі вертают по вакацийній перерві до наукы. Парохом православной церкви в Любіні є о. Богдан Репела, якій так само є опікуном місцевой православной молодежы.

Автобус медже Высовом а Ґорлицями

28. серпня/авґуста зачне курсувати реґулярный автобус медже Высовом а Ґорлицями. Траса є орґанізувана приватном фірмом Олькама. Будут то постійны курсы. Розписку мож найти на сайті фірмы, або отримати в автобусі. Того рода получыня ходят уж медже Устьом Рускым а Ґладышовом, Ґладышовом а Ганчовом, Высовом а Краковом, Высовом а Новым Санчом і Высовом а Ґрибовом. Тепер дійде як раз безпосереднє получыня медже высівскым здройом в Ґорлицями. На автобус будут продаваны єдноразовы або місячны білеты. Деталі мож глядати в орґанізаторів трасы. Хоц вакацийный час ся уж такой кінчыт, з получыня певністю будут корыстати ученикы, але при тым і осінні туристы Низкого Бескіду, якы подорожуют по тій части Лемковины.

Уж в неділю премєра «Бомбля»

Припоминаме, што Стоваришыня ім. Мирка Нагача «Білый сокіл» та Меджепоколіньова Tеатральна Ґрупа Племя рыхтуют пару спектаклів «Бомбля», на основі оповіданя покійного Мирка Нагача з тым самым наголовком. Театральня адаптация оповіданя єст можлива завдякы дотациі Театрального Інституту ім. Збіґнєва Рашевского, котрый початком рока оголосил конкурс внесків на дофінансуваня. Спектакль вырежысерувала Моніка Бабуля – думкодавчыня і ініцияторка театральной адаптациі, разом з Мариюшом Лясковскым. Што раз ближе є до премєры спектаклю. Одбуде ся она уж в найблизшу неділю, 27. серпня/авґуста о 20.00 год. на сцені в Ждыни при ватровиску. Што важне, спектакль презначеный єст лем для полнолітніх обзерачів.