Сумар дня на 24. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 24. вересня/септембра 2024 р.

«синьов країнов» Петра Медвідя Книгом Рока Пряшівского Самосправного Краю 2023

Радо інформуєме, што книжка нашого редактора Петра Медвідя здобыла перше місце в VII річнику конкурсу Книга Рока Пряшівского Самосправного Краю 2023. Нагороджена публикация то дебютантска збірка поезиі Петра Медвідя пн. «синьов країнов» з ілюстрациями авторства Юрия Червеного, котра вказала ся на осін минулого рока накладом Стоваришыня «Руска Бурса» в Ґорлицях. Нагорода была признана в катеґориі «украіньска і русиньска література». Орґанізаторами подіі были Пряшівскій Самосправный Край, Крайска бібліотека Павла Оршага Гвєздослава в Пряшові і Реґіональны бібліотекы ПСК. Нагороджену публикацию можете придбати в нашым інтернетовым склепі на сайті lem.fm.

Змодернізуют дорогу з Ропы до границі воєвідства

Ґенеральна Дирекция Державных Доріг і Автострад оголосила конкурс оферт на запроєктуваня модернізациі державной дорогы нр 28. Іде о одтинок з Ропы в ґорлицкым повіті до границі малопольского і підкарпатского воєвідств. Документация буде тыкала понад 17 км дорогы. Конкурс оферт не обнимат самых Ґорлиц, бо там тырвают уж проєктовы працы. Цілю задачы єст поправа безпекы і перепустовости дорогы. То уж другій конкурс оферт на тот одтинок – фірма, котра выграла першый конкурс не реализувала задач згідно з гармоноґрамом. Новы оферты будут приниманы до 25. жолтня/октобра.

Єпархіяльный праздник в вроцлавскій православній катедрі

В минулу суботу 21. вересня/септембра, в свято Рождества Пресвятой Богородиці, своє храмове свято празднувала вроцлавска православна катедра, а вєдно з ньом ціла вроцлавско-щеціньска єпархіа. Тогорічны торжества были особливо важны, понеже єдночасно єпархія одзначыла ювілей 100-літя автокефалиі Польской Автокефальной Православной Церкви. Богослужыня очелил Блаженнійшый Митрополита Сава, котрому асистували архієпископ Білостоцко-Ґданьскій Якуб, архієпископ Вроцлавско-Щеціньскій Юрий, архієпископ Перемышльско-Ґорлицкій Паісий, єпископ Лодзіньско-Познаньскій Афанасий і єпископ Сємятицкій Варсонофій. Присутне было духовенство вроцлавско-щеціньской і другых єпархій. При нагоді святкувань в притворі святыні была одкрыта і посвячена таблиця припоминаюча ювілей 100-літя автокефалиі.

Ювілей Зорі і Росы уж в тоту суботу

Уж в найблизшу суботу 28. вересня/септембра в Устю Рускым одбуде ся ювілейный концерту хорів Зоря і Роса, якы будут празднувати 20-літя свойой діяльности. Оба ансамблі, діючы при Ґмінным Осередку Культуры в Устю Рускым, од років плекают музичну спадковину реґіону, презентуют традицийны лемківскы, украіньскы і погіряньскы співанкы. Окрем Зорі і Росы на концерті гостинно выступит ансамбль Бурян. Концерт одбуде ся в авли Комплексу Шкіл в Устю Рускым. Початок о 16.00 год. Вынятковым елементом ювілейного концерту буде премєра музичной платні під наголовком «Повороты». Альбум то свого рода підсумуваня послідніх років артистичной діяльности хору Зоря, находят ся на ним пісні, котры роками были основом репертуару хору. Буде то уж друга в доробку колективу платня. Веце про оба хоры і іх ювілей прочытате в дописі на нашым портали.