Сумар дня на 25. липця/юлия 2023 р.

Приносиме вам сумар медияльной ґрупы ЛЕМ.фм+ на ден 25. липця/юлия 2023 р.

Крениця Форум 2023

Од пятниці 13. до неділі 15. вересня/септембра тр. буде проходил Конґрес Крениця Форум. В подіі окрем польского президента Анджея Дуды возмут участ і запрошены головы другых держав. Крениця Форум 2023 то медженародна подія, яка лучыт бізнес, політику і академіцкє середовиско. То простір одкрытой выміны мысли, дискусий на найважнійшы соспільно-економічны темы та будуваня реляций на высшым рівни. Цілю проєкту єст змінцяня безпекы, социяльной спійности та економічного положыня Польщы і держав реґіону Середньо-Східньой Европы. Головным партнером подіі буде малопольскє воєвідство. Свою присутніст в Креници заповіли уж представникы медий з цілого світа. Центральным пунктом тогорічного Крениця Форум буде Польско-Кореаньскій Форум. Крениця находит ся в самым серци реґіону Середньо-Східньой Европы, што має символичне значыня, кєд же Польща являт ся стратеґічным місцьом для інтересів Полудньовой Кореі, заінтересуваной експанцийом на европейскых рынках.

На Колоницкым сідлі будуют центр Парку темного неба

Як поінформувало Оділіня комунікациі Пряшівского Самосправного Краю (ПСК) на Колоницкым сідлі росне новый дослідничо-презентацийный центр Парку темного неба. Центр є частю Астрономічной обсерваториі на Колоницкым сідлі. Є то головный інвестициjный продукт медженародного проєкту Карпатска стежка звізд, котрый є фінансуваный з европейского проґраму ENI, якій лучыт Словацию, Мадяры, Украіну і Румунію в рамках середовисковых проєктів. На активности в рамках черезграничной спілпрацy орґанізаций, занимаючых ся еколоґічным проблемом світлового смоґу, Выгорлятска звіздарня в Гуменным, заряджувательом якой єст ПСК, здобыла понад 270 тис. евро. Головном цілю проєкту єст утримати мінімальнyj рівен світлового забруджыня в парках темного неба в тьох державах – на Словациі в Полонинах, на Украіні в Закарпатскій области і на Мадярах в верховині Букк. Рівен забруджыня неба мал бы быти систематично мірянyj і публикуванyj. В рамках проєкту мали бы быти створены і сіт моніторінґу світловоgо смоґу, інформацийна кампанія, серия конференций, варштатів і місця до обзераня і фотоґрафуваня звіздного неба. Деталі чытайте в статі на нашым портали.

Рушыл Громадяньскій Буджет Міста Ґорлиці

Вчера рушыла єденадцета едиция Громадяньского Буджету Міста Ґорлиці. До 1. вересна/септембра мож зголошувати своі пропозициі задач до реализациі. Право зголосити свою ідею має каждый жытель Ґорлиц, котрый скінчыл або скінчыт в тым році 16 років. До выданя єст разом 900 тис. злотых. Голосувати на зверифікуваны ініциятивы буде мож в першій половині жолтня/октобра. Дрібниці найдете на сайті Містного Уряду в Ґорлицях.

Концерт памяти Димитрия Бортняньского в Бортным

Припоминаме, што уж в тоту суботу 29. липця/юлия Музей Дворы Карвациянів і Ґладышів просит до музейной церкви в Бортным на концерт пн. «Тобі співаме» памяти Димитрия Бортняньского. Подія пройде в рамках VIII едициі Медженародного Фестівалю «При Джерелах». В проґрамі концерту находят ся творы Бортнаньского, лемківска музика і світовы творы клясичной музикы. Выступлят: тенор Назар Тацишын, Юлия Дошна, на гушлах Мариюш Мончак і Віктор Шмайда на фортепіані. Концерт зачне ся о 16.00 год. Вступне дармо.