Сумар дня на 25. мая 2022 р.

Приносиме вам сумар медияльной ґрупы ЛЕМ.фм+ на ден 25. мая 2022 р.

ГСУ з дальшыма даныма. Меншыны мусят ждати до осени

Головный Статистичный Уряд вказал дальшу част вступных результатів повселюдного спису з 2021. Тым разом опрацували демоґрафічны і социяльны даны. Выходит з них, што Польща робит ся штораз старша, а єдином віковом ґрупом, котра ся не зменшат, сут сеньоры. Іх чысло протягом остатніх 10 років збільшыло ся о веце як 30% (з 6,5 млн до близко 8,5 млн осіб в віку выже 60 року жытя – в примірі жен, і 65 років – в примірі мужчын). Чысло осіб в тзв. продукцийным віку зменшыло ся о 9%. Росне тіж чысло жытелів Польщы, котры мешкают на селах, частійше ся розводиме і долше працуєме. Даны, кторы найбарже нас інтересуют, значыт звязаны з нацийонально-етнічном структуром – нацийонально-етнічна приналежніст і язык хоснуваный дома, опубликуваны будут аж в періоді од вересня/септембра до листопада/новембра.

Місяц Фотоґрафіі і наслідства Акциі «Вісла»

Од суботы, 27. мая, в славній краківскій Крікотеці будут презентуваны знимкы лемківской фотоґрафкы і поеткы Катажыны Шведы. Выстава пн. «There Is No One Nearby to Share With» презентувана буде в рамках секциі ShowOFF фестівалю Місяц Фотоґрафіі в Кракові, єдной з найважнійшых фотоґрафічных подій в Европі. В просторах Крікотекы повішены будут фотоґрафіі з циклю, котрый Катажына Шведа назвала «Земля». Артистка посередництвом знимок порушат тему втраченой вітчызны-материньской землі. Фотоґрафіям товаришыт звукова стежка (в лемківскым языку) з фраґментами споминів жытеля Лемковины – Михала Кушвары, і вершів Катажыны Шведы.

«Лемковина по обох странах Карпат», «Никыфор» на торгах во Варшаві

В рамках варшавскых Торгів Книжок пройдут дві авторскы стрічы з автoрами повязаныма з Лемковином. Уж заран од 16.00 год. буде мож стрітити ся зо Станіславом Криціньскым, краєзнавцьом, автором м.ін. тритомовой публикациі о істориі Лемковины. В пятницю пройде стріча з Марийом Стшелецком, авторком книжкы «Бескід без кіту» та другой єй части «Бескід без кіту. Зима». В часі торгів в Варшаві премєру буде мала єй найновша книжка «Никыфор». Обі стрічы пройдут на стоіску но 73 выдавництва Libra PL, будучого выдавцьом вшытых выміненых публикаций.

Дальшы інгаляториі в Малопольщы

На обшыри Малопольщы возникнут 22 новы солянковы інгаляториі. Самоуряд воєвідства презначыл на тоту ціль 3,5 млн зл. 23. мая маршалок Вітольд Козловскій переказал першы промесы на будову обєктів самоурядовцям м.ін. з ґорлицкой ци сандецкой земель. Війтове м.ін. ґмін Устя Рускє, Ґрибів ци бургомайстер Мушыны одобрали промесы в рамках конкурсу «Малопольскы Солянковы Інгаляториі». Промесы вручали тіж посол Патрик Віхер та радны малопольского воєвідства Ядвіґа Вуйтович і Станіслав Пасонь. Інгаляториі будут загальнодоступны і дармовы, запроєктуваны так, жебы могли іх хоснувати так само діти, сеньоры ци особы з неполносправностями.

Середа і подіі 10. Русиньского Фестівалю во Свиднику

Днес в рамках ювілейной 10. едициі Русиньского Фестівалю во Свиднику в просторах Піддукляньской Книжниці во Свиднику презентувал буде ся Інститут Русиньского Языка і Культуры Пряшівского Університету, а заран Словацкій Нацийональный Музей – Музей Русиньской Культуры в Пряшові. Од пополудня на обшыри Церковной Школы св. Юрия во Свиднику проходити будут подіі в рамках части названой як Фесітваль Віры – два концерты та вечернє богослужыня. Од пятниці ґаля-концерты будут проходити в просторах свидницкого амфітеатру.