Сумар дня на 25. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 25. жолтня/октобра 2023 р.

Русиньска меншына з третім передставником в Комісиі

В понедільок 23. жолтня/октобра в просторах Уряду Полномічного Влады Словацкой Республикы про Нацийональны Меншыны прошли выборы двох новых членів до Комісиі про Нацийональны і Етнічны Меншыны Рады Влады Словацкой Республикы про людскы права, нацийональны меншыны і родову рівніст. Выборы были орґанізуваны зато, же на Словациі была вызнана додатково вєтнамска меншына, а тіж зато, же рішыньом Комісиі русиньска меншына буде мала о єдного члена комісиі веце (буде не двох, а трьох), в звязку з результатами списуваня жытелів в тій державі. До 17. жолтня/октобра мусіли ся зареґіструвати заінтерсуваны кандыдаты і орґанізациі охочы голосувати. Выберали члена комісиі і заступцю. На третього члена комісиі зголосил ся Мартін Караш, председа Русиньской Оброды на Словациі, а на заступцю – Мафтей Допіряк, секретар Округлого Стола Русинів Словациі. Голосувало вісем русиньскых орґанізаций. Обі кандидатуры перешли, што означат, же членами Комісиі про Нацийональны і Етнічны Меншыны за русиньску меншыну сут: Мартін Караш, Петро Медвідь і Мілян Ян Піліп, а іх заступцями: Петро Штефаняк і Мафтей Допіряк. Найблизше засіданя комісиі, уж в новым складі, пройде в грудни/децембрі тр.

Поміч пошкодуваным в землетрясіню

Пряшівскій Самосправный Край выділил зо свого буджету 100 тис. евро на поміч людям, котры потерпіли з причыны недавного землетрясіня. Грошы розділит Фундация ПСК про підпору родины. Грошы достанут лем фізичны особы. Будут мочы іх схоснувати на одбудову дому, мешканя ци закуп ґратя, меблів ітп., котры ся знищыли. Жупан ПСК Мілян Маєрскій надіє ся, што і нова влада Словацкой Республикы буде жадала Европейску Комісию о фінансову поміч в рамках Фонду Солідарности Европейской Уніі. ПСК найпевнійше буде жадал грошів для Выгорлятского Музею в Гуменным, котрый выцінил шкоды по землетрясіню на коло 300 тис. евро. Потерпілым жытелям Пряшівщыны помагают і інчы доноры, м.ін. малопольскє воєвідство. На 5. листопада/новембра рішене є збераня грошів во вшыткых храмах грекокатолицкой Пряшівской Архієпархіі – головні на направу шкід по землетрясіню в церквах, на плебаніях, але і в приватных хыжах.

Саґа Ґрибів одсвяткувала

В суботу 21. жолтня/октобра в Містным Центрі Культуры в Ґрибові прошла промоцийна стріча артистично-історичного альбому «Тихій Мемориял – Ґрибівска Саґа». Альбум є звінчыньом діянь трилітнього проєкту, котрого цілю є упамятняти і привертати памят о жытелях Ґрибова і околиц – о Жыдах, Лемках, Ромах і Поляках. В публикациі нашли ся візуальны і текстовы наррациі о Ґрибові і його жытелях представленых тіж на муралях і дескалях Аркадиюша Андрейкова. На промоциі альбому участны были автор муралів, авторы текстів і фотоґрафій в альбомі – особы заанґажуваны в діяльніст Соспільного Архіву Ґрибова «Саґа Ґрибів», м.ін. Каміль Кмак, Анна Борух, Анна Курдзєлевич ци Мария Адамік. Єдном з родин, котра нашла ся на мурали і в альбомі, є родина Романяків в Фльоринкы, выселена до Михалова – Михал Романяк ціле своє жытя был звязаный з лемківскыма справами. Брал участ в творіню ідеі Лемківской Ватры, з його ініциятивы станула в 50. річницю Акциі Вісла в Михалові капличка, припоминаюча о выгнаню Русинів з рідной землі. Мураль Романяків находит ся во Фльоринці.

Занята для діти і молодежы

Польковицкій Центр Вольонтарияту реализує проєкт «Pasjoteka Młodego Człowieka». Од найблизшого вікенду в суботы і неділі цілый листопад/новембер і груден/децембер молодіж в віку од 9 до 14 років буде могла брати участ в розмаітых активностях, як напр. артистичных варштатах, балі, прогульках, вернісажы. Цілю проєкту є інтеґрувати полносправны діти з дітми з неполносправностями, збогатити жытя молодежы і розвивати в них социяльны вартости. Чысло місц ограничене – мож ся зголошати під адрес wolontariat@ckpolkowice.pl. Участ во вшыткых діянях є безплатна.

Фот. Grybow24.pl