Сумар дня на 27. квітня 2026 р.

Приносиме вам сумар медияльной ґрупы ЛЕМ.фм+ на ден 27. квітня 2026 р.

Дальшы подіі товаришучы выставі «Формы присутности. Штука Лемків/Карпатскых Русинів»

Ближат ся дальшы подіі, якы товаришат выставі «Формы присутности. Штука Лемків/Карпатскых Русинів» презентуваній в Державным Етноґрафічным Музею в Варшаві. Заран, в віторок 28. квітня/апріля др габ. Томаш Квока приближыт заінтересуваным історию войводиньскых Русинів, іх міґрацию до Паноніі і тото, як столітями, далеко од карпатской вітчызны, плекали свою достоменніст. В неділю 3. мая діти з опікунами будут мочы взяти участ в варштатах поп-артовых почтовых карток. В четвер 7. мая одбуде ся тематичне опроваджаня пн. «Памят». Поведе го куратор выставы др Михал Шымко. В неділю 10. мая, пройдут дальшы фамелийны варштаты з циклю «На лемківскым пути». Тым разом участникы заінспіруют ся краєвидами карпатскых лісів, жебы покрасити полотняны торбы печатками. А в віторок 12. мая одбуде ся выклад з назвом «Присутный: Юрий Новосільскій», якій выголосит др Кристина Черні. Особлива увага буде посвячена лемківскому походжыню Новосільского – часто помияному аспектови достоменности, котрый в в сутьовый спосіб влиял на його артистичну вражливіст і творчы выборы. Дрібниці о вшыткых подіях найдете на інтернетовым сайті Державного Етноґрафічного Музею в Варшаві.

Фестіваль Фольклору Русинів Словациі Камюнка

Кінцьом мая в селі Камюнка на Пряшівскій Руси одбуде ся дальшый річник Фестівалю Фольклору Русинів Словациі Камюнка. Подія пройде в днях 30.-31. мая в природным амфітеатрі Дубне. Як подают орґанізаторы, традицийный фольклорный фестіваль, котрый лучыт Русинів зо Словациі і заграниці, буде проходил в Камюнці уж 61. раз. І в тым році заоферує атракцийный проґрам і цікавы товаришучы подіі. Орґанізаторами подіі сут Русиньска Оброда на Словациі, Село Камюнка, Любовняньскій Освітній Центр і орґанізация молоды.Русины. Орґанізаторы неодолга представлят проґрамовы блокы, выконавців і дальшы фестівальовы новинкы.

Фестіваль Культуры Русиинів Словациі – Русиньскій Фестіваль в Свиднику

Ближыт ся і 14. річник Фестівалю Культуры Русиинів Словациі – Русиньскій Фестіваль, котрого головным орґанізатором є Окресна Орґанізация Русиньской Оброды в Свиднику. Подія проходит в Свиднику од 2013 р. Фестіваль тырват цілый тыжден і обнимат такы подіі як выставы творів штукы, показы фільмів, бесіды, як і выступы музичных, танцювальных і театральных ґруп. Од понеділька до четверга проходят ріжного рода товаришучы акциі. В пятницю зачынат ся головна част фестівалю – в свидницкым амфітеатрі, і тырват до неділі. 14. Річник Русиньского Фестівалю в Свиднику пройде в днях 25.-31. мая. Як дотля подали орґанаторы, в проґрамі на пятницю єст м.ін. 7. річник Фестівалю Орфеус – музичной переглядкы авторской русиньской творчости, выступы фольклорного ансамблю Шаришан і дальшых. В суботу запрезентує ся м.ін. ПУЛьС з Пряшова – єдиный в світі професийный русиньскій ансамбль, фольклорна ґрупа Заруба з Няґова, Душан Янечек і Прасліца. В недію буде мож видіти выступ Fabrici Folk Production – Dominik Fabrici, окрем того запрезенуют ся домашні ансамблі і гості. На сайті Фестівалю мож уж придбати 3-дньовы білеты вступу. На фейсбуковым сайті Русиньского Фестівалю фурт являют ся інформациі о дальшых подіях і ансамблях, што выступлят в амфітеатрі. Полный проґрам буде опубликуваный уж неодолга.