Сумар дня на 27. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 27. квітня/апріля 2022 р.

Потягом до самых Ґорлиц

Місто Ґорлиці неодолга буде могло похвалити ся дальшыма реализациями. Завдякы партнерскому проєктови Малопольского Воєвідства, Підкарпатского Воєвідства, Міста Ґорлиці, Ґорлицкого Повіту та Ґмін Лужна і Мощениця змодернізуют леніі 108 і 110, што для міста означат, же потягы зас зачнут дотерати до стациі в самых Ґорлицях, а не лем до стациі Ґорлиці-Заґужаны. Дотепер было то міцно ограничене. В рамках проєкту зревітализувана буде желізниця на одтинку Ґорлиці – Ґорлиці-Заґужаны та Ґорлиці-Заґужаны – Ясло, окрем того в Ґорлицях зроблят желізницьову лучницю медже леніями 108 і 110. Задачы сфінансуваны будут з урядового проґраму Желізниця Плюс.

З новыма рондами і без корків?

Як подают локальны медиі, не лем в обшыри желізниці жде місто Ґорлиці революция. Порталь Gorlice24 дотер до концепциі Ґенеральной Дирекциі Державных Доріг і Автострад, подля котрой в місті явит ся пят новых ронд, перебудувана буде державна дорога но 28 в обшыри міста. Пляны єй перебудовы принял в 2019 році Міністер Інфраструктуры Анджей Адамчык. Проєкт рыхтує проєктово-бадавче бюро Транспроєкт-Варшава і обнимат він ґрунтовну перебудову державной дорогы на цілым одтинку медже границями міста. Новы ронда мают явити ся м.ін. на скрижуваню ул. Косцюшкы (Коściuszky) і Св. Максима, ул. Косцюшкы з ул. Венґєрском, а в місци найвекшого скрижуваня зо світлами, на тзв. Заводю, явит ся турбінове рондо. Інвестиция в Ґорлицях єст частю перебудовы державной дорогы но 28 од Нового Санча до границі малопольского воєвідства, має ся закічныти найпізнійше до 2027 рока.

Чергова видокова вежа…

Маґурскій Нацийональный Парк презначыт веце як 70 тис. зл, жебы вознести обсервацийно-видокову плятформу в Грабі. Перед парома днями скінчыл ся другій конкурс оферт. Тым разом нашол ся выконавця, котрый запропонувал ціну, котра містит ся в заплянуваным буджеті. Плятформа буде одкрыта до половины липця/юлия. Вознесут єй на горі о назві Высокє (657 метрів н.р.м.). Близко плятформы поставлят три таблиці з візуализацийом панорамы, дороговый знак і лаву. На самым вершку доступны будут дві люнеты. Конструкция буде осаджена на стопах высокости 8 метрів. Сама плятформа помістит не веце як 10 осіб в єдным часі. Як подає реализатор інвестициі, Маґурскій Нацийональный Парк, конструкция не буде мала неґативного влияня на природничы жытлиска ани на хоронены ґатункы рослин, не нарушыт еколоґічных коридорів звірят.

Нове місце стріч для польковичан

На мапі Польковиц явило ся нове місце: Рынок 27 – Салон. То місце стріч доступне для вшыткых жытелів Польковиц, од наймолодшых до найстаршых. В дополудньовых годинах стрічал ся гын буде Клюб Сеньорів діючый при Осередку Социяльной Помочы, пак будут проходити культурны подіі для мешканців. Занятя орґанізувати будут робітникы Центру Культуры в Польковицях. Окрем варштатів, в пляні сут тіж концерты ци інчы ініциятивы, цілю якых єст інтеґрация жытелів міста. Польковицкій Салон урухомили завдякы фундушам міністерства на проґрам Сеньор+ і грошам з ґміны Польковиці.

Фот. gdzielosponiesie.pl