Сумар дня на 27. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 27. вересня/септембра 2023 р.

Польковиці зас лідером

9668,80 zł – такій дохід per capita дозволил Польковицям заховати позицию лідера в катеґориі повітовых міст серед найбогатшых самоурядів в 2022 році. Результаты ранкінґу оголосило Писмо Територияльного Самоуряду «Спільнота». Каждого рока тот маґазин рыхтує зоставліня найбогатшых самоурядів в Польщы. Што важне, обрахуваня при робліню ранкінґу не берут до увагы доходів, што походят з цільовых дотаций, бо є то лем хвильове звекшыня буджету на дану інвестицию, а не образ тырвалого звекшыня заможности. Бургомайстер Польковиц Лукаш Пузнєцкій вельократні підкрислял, што власти міста реализуют прецизийні заплянувану буджетову політику, основану на анализах і на рацийонализациі выдатків, што веце – самоуряд одповідньо реаґує на ситуацию на рынку інвестиций і все єст зрыхтуваный на зміны. Одповідні інвестициі в інфраструктуру, охорону здоровля, поправу безпекы, аж і ревітализацийны діяня перекладают ся на факт, што заможніст самоуряду може одчути каждый мешканец Польковиц. Польковиці то єдине місто на Нижнім Шлеску, котре нашло ся на тым списку.

Посол Ковальскій проти меншынам

Перед двома днями перед сідимом Соспільно-Культурного Товариства Німців на Опольскым Шлеску віцеміністер рільництва Януш Ковальскій задеклярувал, што зложыт проєкт уставы, котрый має зліквідувати привілегію німецкой меншыны в Польщы. Януш Ковальскій, посол Суверенной Польщы, стартує з опольского округу і як раз там Комітет Німецка Меншына хоснує привілегію, в котрій кандидат той соспільности не мусит перекрачати 5-процентового выборчого порогу. Ковальскій заповіл, што зробит вшытко, жебы уж на першым реґулярным засіданю Сойму приняти уставу, котра знесе выборчу привілегію для Німецкой Меншыны. Прівілегія, котра не подабат ся посланцьови Ковальскому не тыкат єднак лем німецкой соспільности в Польщы. Подля 197 артикулу Выборчого Кодексу нацийональны і етнічны меншыны в выборах не мусят перекрочыти 5-процентового выборчого порогу в скали державы. Подля Ковальского тот запис є незгідный з Конституцийом і хоче го раз на все выкрислити.

Нагороды Малопольского Воєвідства признаны

22. вересня/септембра в Мысленицях прошло вручаня Нагорід Малопольского Воєвідства ім. Владислава Оркана. Нагорода тота признавана є за пропаґуваня ідеі реґіонализму та выдатны осягніня в обшыри артистичной і кульутрной діяльности серед локальных соспільности Малопольщы. Выріжнят локальных творців креуючых артистичны вартости оперты на знаємости локальной культуры і реґіональных традиций. Того рока І нагороду достал Ансамбль Пінсі і Танця Ziemia Myślenicka в Мыслениц, ІІ нагороду Реґіональный Ансамбль GÓRALE ŁĄCCY з Лонцка, а третю – PODHALE Grupa Spiska з Юрґова. Головный лавреат – Репрезентацийный Фольклористичный Ансамбль Міста і Ґміны Мыслениці Ансамбль Пісні і Танця Ziemia Myślenicka то вельопоколіньовый ансамбль, якій зосереджат близко двіста артистів. Дал десяткы концертів і соткы сценічных презентаций на державных і заграничных сценах, брал участ в чысленных переглядах і фестівалях в Европі, Азиі ци Пілнічній Америці. Што рока орґанізує Медженародны Малопольскы Стрічы з Фольклором в Мысленицях.

Закінчыня туристичного сезону

В найблизшу неділю 1. жолтня/октобра в Біличній при церкви пройде закінчыня туристичного сезону 2023. Літургія в інтенциі туристів буде одправлена о 14.00 год. Пак на стоісках при церкви буде мож купити реґіональны стравы і продукты.

Фот. polkowice.eu