Сумар дня на 28. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 28. квітня/апріля 2025 р.

Музей Лемківской Культуры в Зындрановій зас буде одкрытый

Музей Лемківской Культуры в Зындрановій буде зас доступный для звиджаючых. Перше в тым році до Музею мож было зайти лем в січни/януарі. Од 1. лютого/фебруара музей был, на жаль, закрытый для одвиджаючых, кєд же квота меншыновой дотациі признана на тот рік Міністром Внутрішніх Справ і Адміністрациі зас была за низка, жебы мож было забезпечыти нормальне фунґуваня і бытніст музею. Як в минулым тыжни поінформувал Музей Лемківской Культуры в Зындрановій, просят вшыткых уж на маівку – діяльніст музею буде взновлена од 1. мая тр. В місяцях май – вересен/септембер музей буде одкрытый штоденно в годинах од 9.00 до 17.00, а в місяцях жолтен/октобер – груден/децембер в годинах од 8.00 до 16.00. Музей буде закрытый в понедількы і уставово вільны дни.

Неодолга рушат працы при осувиску во Фльорицні

Осувиско во Фльоринці буде забезпечене. Працы мают рушыти в половині мая і потырвати до 15. грудня/децембра. Як подал директор Повітового Заряду Доріг в Новым Санчы Войцєх Блажусяк, то барз небезпечне місце. Одтинок не єст долгій, але о хвилю міг бы уж не быти переіздный. Плянуване єст там палюваня, жельбетова беля та перепуст і нове покрытя на одтинку близко 150 м. В часі прац дорога може быти заперана на 2-3 дни. Переізд для жытелів буде товды запевненый. Новосандецкій повіт достал з буджету державы 2,7 млн злотых на забезпечыня осувиска во Фльоринці і закладал вклад власный в высокости 700 тис. злотых. По конкурсі оферт вказало ся, же працы вынесут близко 2,1 млн. Догваріня з выконавцьом єст уж підписане.

Конкурс на новы русиньскы драматичны тексты

Новинарско-Выдавательна Установа «Рускє Слово» інформує о конкурсі на новы русиньскы драматичны тексты на 23. Русиньскій Фестіваль Малых Сценічных Форм “Дюра Папгаргай” – 2025, котрый буде проходил в Новым Саді в Сербіі. В конкурсі можут вязти участ новы русинькы театральны тексты малых сценічных форм, написаны громадянами Сербской Республикы і інчых держав. Єден автор може прислати на адрес орґанізаторів або майльом найвеце два своі тексты в терміні до 31. мая тр. Реґулямін найдете на сайті Новинарско-Выдавательной Установы «Рускє Слово».

Др. Богдан Горбаль оповіст о лемківскых бізнесменах в Америці

Уж заран, в віторок 29. квітня/апріля одбуде ся онляйнова стріча з др. Богданом Горбальом, якій оповіст о лемківскых бізнесменах в Америці. Др Богдан Горбаль то історик і бібліотекар, куратор славяньской і східньоевропейскых колекций в Ню Йоркскій Публичній Бібліотеці. Єст автором веце як стох дописів і шестьох книжок, векшіст його робіт зосереджат ся на лемківскых темах. В остатнім часі написал книжку пн. From Thatched-Roof Houses to Immigrant Entrepreneurship: First Generation Lemko-American Businessmen, котрой наголовок мож перевести як: Од хыж крытых стіхом до підприємства іміґранітв: лемківско-американьскы підприємці першой ґенерациі. Др Горбаль представлят в ней тему лемківскых еміґрантів до Америкы, якы зачали приізджати гын кінцьом ХІХ ст. Першым іх занятьом была найчастійше тяжка і небезпечна робота в майнах. Некотрым повело ся основати своі фірмы. Книжка і онляйнова прелекция становлят перегляд лемківской оперативности. Стріча з др. Гобральом одбуде ся через плятформу ZOOM 29. квітня/апріля о 19 годині за східньоамериканьскым часом.