Сумар дня на 28. липця/юлия 2022 р.

Приносиме вам сумар медияльной ґрупы ЛЕМ.фм+ на ден 28. липця/юлия 2022 р.

Крениця одзыскала грошы на Velo Krynica

По більше як трьох роках старань повело ся Креници одзыскати веце як 3,4 млн зл унійной дотациі на будову біциґльовой стежкы Velo Krynica, яка была узнана за будовляну самоволю. Середкы засилили уж буджет міста. В 2018 році вчас реализациі проєкту до побудуваня пути схоснували інчы материялы як подали в документациі. На зробліня 12-кілометровой трасы ґміна выдала около 5,5 млн зл. Близко 3,4 млн зл з выміненой квоты мала становити дотация з Европейского Фундушу Реґіонального Розвитку. Грошы не трафили єднак на конто Містного Уряду в Креници, зато же без згоды Маршалківского Уряду схоснували інчы материялы на посліднім етапі рыхтуваня стежкы. Крениця заплатила товды за цілу інвестицию більше як 5 млн зл з буджету ґміны. Три рокы тырвала леґализацийна процедура і стараня, жебы одзызкати дотацию.

Молитва о мир на Святій Горі Явір

В найблизшу неділю в рамках VII Медженародного Фестівалю при Джерелах в каплици на Святій Горі Явір одбуде ся музично-словный концерт пн. «Молитва о мир». Артистична част буде мала форму медитаций. Через ню присутны будут молитовно просити о мир на світі. Подія зачне ся з заходом сонця, о 20.00 год. Выступлят Мариюш Мончак з гушлями (думкодавця Фестівалю при Джерелах) і Аліция Сєйка з фортепіяном. Моніка Бабуля буде рецитувала. Вводне слово даст Ева Мончак. Спілорґанізаторами медитаций сут грекокатолицка парохія св. Михала в Высовій, Ґмінный Осередок Культуры в Устю Рускым та Фундация Ars Activa.

Спрібуйте участи в конкурсі на локальны ініциятивы

Фундация Реґіональный Інститут просит позаурядовы орґанізациі до участи в конкурсі на локальны ініциятивы для творіня соспільных архівів. Фундация оферує сфінансуваня інциятивы звязаной з познаньом, пошырюваньом культуровой спадковины і збераньом, забезпечаньом, діґітализацийом і удоступняньом архівальных материялів звязаных з том спадковином, оферує тіж варштат і порадництво на тему творіня такых архівів в формі онляйн. Выполнены формулярі зголошынь треба складати особисто в Ряшові, слати почтом або на майльовый адрес фундациі до 8. серпня/авґуста тр. Деталі найдете на інтернетовій страні Фундациі Реґіональный Інститут.

«Од Русаль до Яна» – уж в тот вікенд

Припоминаме, што уж в найблизшу суботу і неділю Музей Лемківской Культуры в Зындрановій просит на свято «Од Русаль до Яна». По пандемічній перерві акция вертат до традицийной формы. В проґармі подіі находит ся м.ін. одвиджаня музею, прелекциі, конкурсы і ремісничы показы. Орґанізаторы задбали тіж о музичну оправу – на сцені запрезентуют ся м.ін. ансамблі Серенча ци Гудакы. В неділю одбуде ся служба божа в церкви св. Миколая в Зындрановій. Не бракне і части посвяченій споминам на траґічны подіі, якых досвідчыли Русины з Лемковины. На обшыри Музею находят ся памятникы посвячены жертвам лаґрів в Талергофі і Явожні, але тіж таблиця упамятняюча выгнаных в рамках Акциі «Вісла». Першый річник «Од Русаль до Яна» был зорґанізуваный в 1992 р.