Сумар дня на 28. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 28. серпня/авґуста 2024 р.

ТАД уж на своім

В понедільок одбыло ся засіданя Заступительства Пряшівского Самосправного Краю (ПСК). Єден з пунктів проґраму засіданя тыкал ся одкупліня будинку через Театр Александра Духновича (ТАД) в Пряшові. Фінальні послянці вырішыли, же єдиный во світі професийональный русиньскій театр одтепер буде мал свою власну сідибу (до той поры головна сідиба Театру была лем в аренді). ТАД має свою Велику сцену і дальшы просторы в будові Пульского Палацу з 1750 р., котры не были його власністю, дотля театр мал на власніст лем добудуваны просторы, або такы, што были приспособлены в пізнійшых роках діяльности, як нп. Мала сцена і адміністрация ТАД. Як раз од минулого рока в тій части театру подарило ся зреализувати велику реконструкцию, вдяка чому акторы і робітникы театру достали ліпшы условія про свою роботу. Намаганя купити будинок были уж од долгых років, но аж тепер ся тото довершыло. Купно будинку од римокатолицкой Церкви, яка є його властительом, буде за більше як 2 млн евро.

Молебен до св. Максима в ЗША

В звязку зо зближаючым ся праздником священномученика Максима Ґорлицкого, Молебен до святого вєдно з пізнійшым історично-культурым проґрамом орґанізуют еміґрацийны кругы зосереджены при американьскым Лемко-Союзі. Подія одбуде ся 8. вересня/септембра в православній церкви в Йонкрес. По богослужыню в парохіяльных просторах доповід на тему жытя св. Максима выголисит діакон Давид Дутканич, якого рід выходит з Лемковины. Молебен зачне ся о 13.00 год.

Біциґловый райд по Лемковині

Стоваришыня GorliceBike просит до участу в біциґльовым райді по місцях повязаных з культуром і історийом Лемків, Бойків і Погірян. Райд одбуде ся в найблизшу суботу, 31. серпня/авґуста. Участникы підут до церкви в Квятони, зайдут по дорозі на воєнны цмонтері, а тіж по Лемковині переідут через неістнуючы днес села – такы як Чорне ци Радоцина. В Радоцині стрітят ся з лісниками. О цікавых подіях і істориях оповіст вчас райду реконструктор і популяризатор локальной істориі Михал Ромпала. Старт і мета будут в Кривій, де на завершыня выступит ансамбль Руской Бурсы з Ґорлиц Терочка, а тіж погіряньскій колектив Поляне.

Вежа на Дукли аж в жолтни/октобри

Видикову вежу на Дукли плянуют одкрыти аж по ремонті початком жолтня/октобра. Вежа была доступна для одвиджаючых од мая до початку серпня/авґуста. Потім ю задля плянуваных ремонтів заперли. В рамках великой модернізациі першого штоку видоковой вежы піде о выміну і дополніня наприклад воздушнотехнічных заряджынь, выміну електроінсталяциі, однову фасады, гыдроізоляциі і реконструкцою стріхы. Сумаричны кошы повязаны з ремонтом вежы то приблизно 381 тис. евро. Уж осіню вежа зас повинна быти одкрыта для туристів, якы хотят видіти прекрасны краєвиды.