Сумар дня на 29. мая 2026 р.

Приносиме вам сумар медияльной ґрупы ЛЕМ.фм+ на ден 29. мая 2026 р.

61. Фестіваль Фольклору Русинів Словациі Камюнка

Заран в селі Камюнка на Пряшівскій Руси зачне ся черговый річник Фестівалю Фольклору Русинів Словациі Камюнка. Подія буде проходила в днях 30.-31. мая в природным амфітеатрі Дубне і Культурным Домі. Фестіваль буде в Камюнці уж 61. раз. Одкрытя пройде в суботу о 15.00 год. В проґрамі «Витайте в Камюнці» выступлят домашні ансамблі і солисты. Дальше фольклорный ансамбль Любовнян запрезентує свій ювілейный проґрам «Дротом Писане». На конец дня буде концерт русиньскых народных пісен обогаченых танцьом, в выконаню м.ін. Мариянны Железной і Анны Сервіцкой. Недільный проґрам зачне ся о 10.00 год. од переглядкы русиньскых співочых ґруп з пілнічно-східньой Словациі. Пак, о 14.00 год. одбуде ся ґаляпроґрам фестівалю з назвом «Барвінкова Камюнка». На сам конец буде мож обізрити тематичный проґрам о первістных звыках і традициях в русиньскых селах. Орґанізаторами подіі сут Русиньска Оброда на Словациі, Село Камюнка, Любовняньскій Освітній Центр і орґанізация молоды.Русины.

Тырват 14. Русиньскій Фестіваль в Свиднку

Тырват іщы 14. річник Фестівалю Культуры Русиинів Словациі – Русиньскій Фестіваль, котрого головным орґанізатором є Окресна Орґанізация Русиньской Оброды в Свиднику. Днес зачынат ся головна част фестівалю – в свидницкым амфітеатрі, і потырват до неділі. В проґрамі на днес єст м.ін. 7. річник Фестівалю Орфеус – музичной переглядкы авторской русиньской творчости і выступы фольклорных колективів. В суботу запрезентує ся м.ін. ПУЛьС з Пряшова – єдиный в світі професийный русиньскій ансамбль. В послідній ден подіі запрезенуют ся домашні ансамблі і гості. Полный проґрам найдете на сайті Русиньского Фестівалю.

Показ фільмів Кжыштофа Кжыжановского з лемківском темом в Устю Рускым

В найблизшу середу 3. червця/юнія в Ґмінным Осередку Культуры в Устю Рускым одбуде ся специяльный показ архівальных фільмів Кжыштофа Кжыжановского з лемківском темом і тыкаючых Низкого Бескіду, орґанізауваный з нагоды ювілею 80. уродин автора та ювілею 65-літя TVP Краків. Показ зачне ся о 18.00 год. В репертуарі сут 4 фільмы: «Польскій ректор з Лемковины» то фільм о Емілияні Чырняньскым, вызначным Лемку, котрый кінцьом 19. столітя был ректором Ягайлоньскочо Університету та гляданю слідів його потомных в Низкым Бескіді; «Мученик за віру вітців» то реляция з канонізациі першого лемківского святого – о. Максима Сандовича. Дальшым образом єст «Лемківска Республика во Фльоринці», што тыкат основаня Руской Народной Республикы Лемків в 1918 р. Послідній – «Ідеме, ідеме, дражкы не знаєме» то реляция зо ждыньской Ватры з 1993 р. Вступне на подію дармо.

В себе. Пікнік лемківской культуры в Ріпках

Дальша подія з нагоды ювілею 80. уродин Кжыстофа Кжыжановского та ювілею 65-літя TVP Краків одбуде ся в днях 5.-6. червця/юнія в Ріпках, на терені вколо Ґалериі в Мамрошів. В проґрамі єст м.ін. перегляд твореных Кжыштофом Кжыжановскым документальных фільмів о реґіоні з товаришучыма дискусиями. Будут тіж концерты. Выступлят м.ін. Юлия Дошна і Івона Іскра Криницка, Мариянна Железна та Оркєстра Святого Миколая. Зо спектакльом выступит тіж Меджеполіньова Театральна Ґрупа Племя з Устя Руского. В проґрамі єст тіж чытаня лемківской поезиі. Окрем того будут варштаты співу і зілярства, презентациі традиций реґіону, лемківской кухні, кєрмеш творів ручной роботы, а аж і кінна ізда. Каждый ден подіі завершыт огниско.