Сумар дня на 3. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 3. лютого/фебруара 2023 р.

Хотят жебы од наступного зимового сезону Beliansky Express рушал з Крениці

Іщы лем до 26. лютого/фебруара буде курсувал Beliansky Express, вікендовый трансграничный потяг реляциі Мушына – Попрад. Подорож тырват нецілы дві годины і веде м.ін. через Стару Любовню ци Кежмарок. В остатніх роках получыня было барз популярне серед польскых і словацкых туристів. На жаль актуальный розклад ізды дає туристам з Польщы барз мало часу на звиджаня. Кєд іде о єднодньову прогульку, то потяг выізджат з Мушыны о 10.00 годині і вертат уж о 15.29. Дає то барз мало часу на звиджаня Попраду або выізд за місто. Туристы зо Словациі мают аналоґічно ліпшу ситуацию – можут рушыти з Попраду піл осмой рано і вертати назад аж коло 18.00. Як подал Артур Круліковскій з Новосандецкого Стоваришыня Любителів Желізниці, актуально ведут консультациі зо Словаками і маршалком малопольского воєвідства. Хотят од наступного зимового сезону змінити реляцию, жебы потяг рушал з Крениці. Так само хотят змінити годины одізду Експресу, так жебы были скомунікуваны з Татряньском Електричком.

Лемковина Вінтер Трейль

В суботу 11. лютого/фебруара пройде чергова, четверта уж едиця Лемковина Вінтер Трейль. Тым разом базом змагань буде Івонич, але старты двох найдолшых дистансів (33 і 55 км) будут з Яслиск. Як обіцюют орґанізаторы, одкрыют перед участниками чысто новы закутины Низкого Безкіду, якы не сут знаны з осінньой едициі бігів.

Европейскій тур Аліны Паш

Етно-фольк раперка і гіп-гоперка з Підкарпатя Аліна Паш одбуде в тым році тур «Слухай». Поділеный він є на дві части – перша з них, в днях од 17. до 26. марця буде проходила на Украіні. Од 29. марця до 11. квітня/апріля артистку буде мож почути і в другых европейскых містах і столицях. «Европейску част» трасы Аліна Паш зачне в Варшаві. Пак выступит іщы в Берліні, Гамбурґу, Бруксели, Кельн, Відни, Будапешті і Празі. Аліна Паш родила ся в селі Буштино на Тячівщыні. В музичній бранжы діє од наймолодшых років. Переломным для єй карєры был дебютантскій сінґєль «Bitanga» з 2018 р., якій лучыт в собі гіп-гоп, русиньскій язык, елементы pop music і карпатскы етно мотивы. Артистка успішно выступує на сценах Украіны і поза єй границями.

Іконы Новосільского на выставі в Супрашли

Аж до 19. грудня/децембра в Музею Ікон в Супрашли мож обзерати часову выставу сакральных творів Юрия Новосільского. Выстава была одкрыта 7. січня/януара, рівно в 100. річницю його народин. Експозиция находит ся в сали ім. проф. Юрия Новосільского, яка за справом презентуваных творів навязує до монастырской каплици. Видіти мож творы выпожычены од Згромаджыня Сестер Облаток в Тынци – олтарный крест зо сценами пасиі і воскресіня, ікону Божой Матери і Табернакль. Выставу дополнюют Ікона Рождества, списаный артистом порядок літургічных молитв і Вераікон. Підчас Рока Юрия Новосільского в музею каждый місяц будут проходити кураторскы опроваджаня і другы звязаны з тым подіі.