Сумар дня на 3. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 3. серпня/авґуста 2026 р.

Прошла 46. Лемківска Ватра на Чужыні

В минулый вікенд в Михалові на Нижнім Шлеску прошла 46. Лемківска Ватра на Чужыні, орґанізувана Стоваришыньом Лемків. Оген, якым найстаршый михалівскій ґазда розпалил ватру, принесли Лемкы з Гір. Пак на михалівскій сцені запрезентувало ся много нашых ансамблів. В рамках даткового проґраму орґанізаторы зрыхтували м.ін. шатро бесід, варштаты, лісовы купелі, зону для діти, спортовы змаганя і много другых атракций. Окрем інчого на варштатах мож было навчыти ся лемківского танця – потрясаной. Пак ватряне, гуляючы потрясану, побили рекорд світа. Традицийно вручено тіж нагороду Никыфора, якой лавреатком остала Штефанія Трохановска. Окрем того Стоваришыня Руска Бурса в Ґорлицях (з нагоды 35-літя реактивациі общества) і наше радийо (з нагоды 15-літя основаня) было доцінене грамотом через орґанізаторів ватры – наше братнє Стоваришыня Лемків.

Потопа номінувана до Оскара

Потопа номінувана до Оскара. Першый ціловечерный по русиньскы граный філм Потопа змагал ся буде о о премію америцкой Академіі Фільмовых Штук і Наук в катеґориі Найліпшый медженародный фільм. Вырішыла о тым Словацка фільмова і телевізийна академія. 99 річник уділюваня Оскарів одбуде ся 14. марця 2027 рока. Веце о номінациі прочытайте на нашым портали.

Дальшы образы Никыфора в колекциі Державного Етноґрафічного Музею в Варшаві

Державный Етноґрафічный Музей в Варшаві купит дальшых 50 образів выдатного лемківского маляря Епіфана Дровняка – Никыфора. То друга транша закупу творів, што походят з вынятковой колекциі, згромадженой выдатным різбяром Альфонсом Карным. Альфонс Карный придбал речены працы кінцьом 40. років ХХ ст. безпосередньо од Никыфора. Вшыткы были выконаны в техніці ґвашу і акварелі. В остатніх роках творчіст Никыфора была презентувана в Державным Етноґрафічным Музею в Варшаві м.ін. на выставі ”Формы присутности. Штука Лемків/Каратскых Русинів” (2026 р.), на якій нашли ся образы з колекциі Альфонса Карного придбаны Музейом в першій траншы. Перше на зламі 2021 і 2022 р. выбраны образы з той самой колекциі мож было обзерати на выставі ”Никыфор. Маляр над малярями”. Закуп образів был дофінансуваный з буджету Міністра Культуры і Нацийональной Спадковины і з середків Самоуряду Мазовєцкого Воєвідства. Вартіст проєкту то близко 630 тис. злотых.

”Енді Варголь. Од крискы до звізды” – выстава в Кракові

Уж од найблизшой пятниці 7. серпня/авґуста в Палаци Штукы в Кракові мож буде обзерати выставу ”Енді Варголь. Од крискы до звізды”. Експозиция зосереджат ся на періоді, коли Варголь іщы лем будувал свій характеристичный стиль і творил власный артистичный образ. На одвиджаючых жде понад 60 ориґінальных рисунків, сітодруків, поляроідів, плякатів і фільмовых материялів. Серед найвекшых атракций найде ся монумнетальна інсталяция “Cow Wallpaper”, што чыслит веце як 30 квадратных метрів. Выстава вкаже тіж барз рідкы проєкты тканин з 50 років, вшыты з них облечыня, першы номеры леґендарного маґазину “Interview”, окладинкы книжок і вінильовых платен авторства Варголя та його піонєрскы цифровы експерименты на компутері Commodore. Выстава буде доступна в Палаци Штукы в Кракові до 27. вересня/септембра тр.