Сумар дня на 30. липця/юлия 2019 р.

Приносиме Вам сумар медияльной ґрупы ЛЕМ.фм на ден 30. липця/юлия 2019 р.

ЛАПіТ «Кычера» на 56. Тыжни Бескідской Культуры

Од 27. липця/юлия до 4. серпня/авґуста тырват 56. Тыжден Бескідской Культуры. Є то не лем свято фольклору і народного кумшту, але передовшыткым танця, співу, музикы, забавы і радости. Імпреза є добром нагодом, жебы мати контакт з рідном народном культуром, як тіж познати ся з ріжнорідном, а нераз орієнтальном культуром інчых держав і народів. Концерты одбывают ся м.ін. в Віслі, Щырку, Макові Підгаляньскым ци Освєнцімі. Серед выступуючых колективів нашол ся і Лемківскій Ансамбль Пісні і Танця «Кычера», котрый протягом остатніх дни вказал свій репертуар на трьох сценах. Недільный концерт в місцевости Жывєц был конкурсовым. Дальшый етап одбуде ся в Закопаным. На тым концерті Кычера выступила з новым проґрамом, вказала лемківскє весіля, дакус подібне до того презентуваного парунадцет років тому, але з новыма танцями, якы походят з Боднаркы. Тепер ансамбль жде на результаты. З тым самым проґрамом Кычеру буде мож видіти на Лемківскій Ватрі в Михалові.

Стріча двох культур – погіряньской і лемківской – в Білянці

В минулу неділю, 28. липця/юлия, на спортовым боіску в Білянці проходила орґанізувана Осередком Культуры Ґміны Ґорлиці подія пн. «На пограничу культур». З даля од розгрітого сонцьом міста стрітили ся дві культуры – погіряньска і лемківска. Выступили штырі ансамблі, два лемківскы – Серенча і Терочка, молодша ґрупа Ансамблю Руской Бурсы в Ґорлицях, та два, котры запрезентували погіряньску музику – Реґіональный Ансамбль «Спід Пустек» та ґрупа Бескіды. Присутны на подіі могли і попрібувати погіряньскы і лемківскы стравы, котры зрыхтувал Кружок Сельскых Ґаздынь. Для наймолодшых заплянуваны были гры і забавы в давным стилю. Подія проходила в рамках проґраму Нацийонального Центра Культуры «ЕтноПольща 2019».

26. Фольклорный Фестіваль «Під Дубровом» в Зубным

27. серпня/авґуста в амфітеатрі в Зубным на Словациі одбуде ся 26. Фольклорный Фестіваль «Під Дубровом». На подіі презентувана буде традицийна культура, музика, танец і спів. В проґрамі фестівалю находит ся торжественна Св. Літургія, котра зачне ся о год. 8.30. Дальше, о 10.30 пройдут футбольовы змаганя. Пак, о год. 14.30 буде одкрытя подіі. Выступит домашній ансамбль Дуброва, Фольклорны Суборы Папінчан з Папіна, Геліґонка з Камениц, Кычера зо Снины, Паробчаці та інчы. Буде і русиньска музика з Русиньскыма Голосами та співачком Мариянном Железном. На сцені запрезентує ся і Тріо Маґуровых з Гуменного, почути буде мож тіж цимбалову музику Прімаш. На 20 год. заплянувано танцувальну забаву, на котрій заграют ансамбль Еста і Діджей РеРо.

Стріча присвячена памяти нежыючых уж мешканців сел Новиця і Прислоп

17. серпня/авґуста в Новици пройде подія пн. «Під єдным дахом». Буде то друга едиция стріч присвяченых м.ін. памяти нежыючых уж мешканців сел Новиця і Прислоп. Подія орґанізувана єст Архівом Новиця-Прислоп та самыма жытелями і любителями Низкого Бескіду. Стріча зачне ся о год. 17.30 спектакльом пн. «Істория барз чудна (…)» в выконаню Театру Мумерус, в режысериі Вєслава Голдиса. Дальше, буде мож обізрити выставу фотоґрафій з колекциі Архіву присвячену памяти мешканців села. Буде і концерт ґрупы Руты Увиты, яка представит весільны і любовны пісні. Подія закінчыт ся сельском забавом, на котрій заграют Вітек Брода з ансамбльом і запрошены гості. Подія є одкрыта, каждый може взяти в ній участ.