Сумар дня на 30. липця/юлия 2024 р.

Приносиме вам сумар медияльной ґрупы ЛЕМ.фм+ на ден 30. липця/юлия 2024 р.

В Любовни при реновациі граду дослідникы нашли много цікавых артефактів

Припоминаме, што актуально тырват реконструкция ІІІ двора і пілнічносхідньой стіны та войсковых касарен з ХVII ст. Як інформовало Одділіня комунікаці Пряшівского Самосправного Краю, однова споминаных обєктів принесе на град нову постійну археолоґічну експозицию, котра быти може буде удоступнена для звиджаючых уж літом будучого року. Попри реконструкциі од початку ведены сут археолоґічны досліджыня, котры принесли много цінных артефактів, такых як части історичного ренесансового кахльовця, а тіж предметы штоденного жытя м.ін. горці, мискы і погары. Додатково, директор музею Далібор Микулик передал, што медже артефактами нашли ся тіж дві добрі захованы монеты, цисаря Леопольда І і Зиґмунта ІІІ. Актуально монеты сут документуваны і будут предметом дальшых досліджынь. За директором – результаты выкопалиск послужат зрыхтуваню постійной експозициі.

В Гостовицях споминали жертвы І світовой войны

В суботу 27. липця/юлия в Гостовицях, окрес Снина на Словациі, туристы з околиці споминали жертвы І світовой войны. Туристична прогулька прошла на місце, де в 1915 році проходлили воєнны діяня. Як про аґентуру TASR повіл Мартін Дробняк – председа Клюбу войсковой історіі Бескіды, туристичный похід орґанізували уж девятый раз при нагоді початку Великой войны. Того рока в подіі участ взяло понад 40 осіб зо Словациі і Польщы. Історична прогулька на верх Скоры першый раз была орґанізувана в 2015 році, товды тіж явила ся думка побудувати на поли дзвінницю, котра буде припоминала павшых вояків. Завершыньом шторічного пытуваня єст пєтный акт коло дзвінниці на верху Скоры,  орґанізуваный єст з підпором Озброєных сил Словацкой Республикы.

Выстартувал Громадяньскій Буджету Міста Ґорлиці

Од 29. липця/юлия мож зголошувати своі думкы в тогорічным проґрамі Громадяньского Буджету Міста Ґорлиці. Зголосити своі ідеі може каждый, хто скінчыл 16 років. Як і в попередніх едициях до роздиспонуваня єст 900 тис. зл. Внескы мож зголошувати до 2. вересня/септембра в Уряді Міста Ґорлиці, особисто або почтово. Што важне, треба зобрати під своім проєктом што найменше 15 підписів. Результаты будут знаны 18. жолня/октобра тр.

«Натуральне Підкарпатскє Пасіня»

Припоминаме, шо ішы лем днес 30. липця/юлия мож складати внескы до проґраму «Натуральне Підкарпатскє Пасіня». До розділіня є веце як 3,3 млн зл. Проґрам Маршалківского Уряду Підкарпатского Воєвідства обнимат пасіня звірят на луках і паствисках того воєвідства. Бенефіциєнтами можут быти позаурядовы орґанізациі, стоваришыня, кооперативы, костелы, спортовы клюбы і нон-профітовы підприємства. Підметы, котры зголосят ділянку під пасіня звірят, зобовязаны сут представити документ, котрый потверджат право до розпоряджаня польом. Цілю проґраму є екстенсивне пасіня звірят, утриманя зеленых обшыри і підпертя триманя звірят.