Сумар дня на 30. мая 2025 р.

Приносиме вам сумар медияльной ґрупы ЛЕМ.фм+ на ден 30. мая 2025 р.

В Ґорлицях одбыл ся ХХ Конкурс Рецитациі Лемківской Поезиі

В пятницю 23. мая тр. в будинку Осередка Православной Культуры «Ельпіс» в Ґолицях одбыли ся переслуханя в рамках ювілейного ХХ Конкурсу Рецитациі Лемківской Поезиі. Двадцет років тому, директор Осередка, а при тым і учытель лемківского языка, о. Роман Дубец зорґанізувал першу стрічу з лемківском поезийом. Товды – в основній школі в Роздзілю. В конкурсах каждорічні выступує парудесятеро діти з основных шкіл ґорлицкого реґіону, якых рыхтуют учытелькы Мирослава Дубец, Варвара Дуць, Орина Гутыряк, Анна Рыдзанич та о. Роман Дубец. През вельо років в змаганях брали участ і школярі з західніх земель, якых рыхтувал учытель Лука Возняк. В тогорічній едициі конкурску молоды рецитаторы деклямували поезию будителів – Александра Духновича, Александра Павловича ци пізнійшых творців ХХ ст., м.ін. творы Івана Русенка, Миколая Буряка, Меляніі Собин. Не бракло творчости сучасных поетів: Петря Мурянкы ци Янка Шкірпана. В катеґориі кляс 0-2 выріжнены были Семан Криницкій, Михал Криницкій і Лена Ротко, в клясах 3-4 Софія Рутковска, Филип Дзюмбеляк і Михалина Вєнцек, в клясах 5-6 Мартин Рутковскій, Павлина Ротко і Єлизавета Русин, а в катеґориі кляс 7-8 Марта Бодак, Дария Ноґавка і Віктория Радзік. Кажда дітина отримала принагідну грамоту і нагороду, был тіж почастунок. Веце на тоту тему чытайте на нашым портали.

В міністерстві бесідували о роли Християньской Теолоґічной Академіі

Віцеміністер Томаш Шыманьскій поінформувал о стрічы, яка прошла в Міністерстві Внутрішніх Справ і Адміністрациі, на котрій стрітил ся з архієпископом проф. Юрийом (Паньковскым), проф. Боґуславом Мілерскым та Канцлер Боґумілом Флішкєвич з Християньской Теолоґічной Академіі в Варшаві (ChAT). Як подал міністер, бесідували о роли ChAT як академіцкого осередка в польскым системі высшого шкільництва, в тым і о єй значыню для теолоґічной і социяльной едукациі в Польщы. ChAT то публична, екуменічна высша школа з близко 70-річном традицийом. Складат ся з двох выділів – Теолоґічного (секциі: православне, протестантскє і старокатолицкє богословя) та Соспільных Наук. За міністром, екуменічный характер учельні спричынят, же реализує она своі задачы сперты на принцип рівноуправніня, спільны вартости вшыткых християньскых віроісповідань та пошану для ріжных культур і традиций.

Лемківска Опера «Голос» верне на сцены

Як поінформували орґанізаторы Лемківской Оперы «Голос», в плянах мают дальшы концерты. Даты і детальны інформациі мают быти поданы неодолга. Покля што, глядают працівників до ділу PR і социяльных медий. Зголошувати можут ся так специялисты, як і очохы до наукы, котры хотіли бы промувати подію і лемківску культуру. Деталі находят ся на фейсбуковым сайті Лемківской Оперы «Голос».

Ден Дітины в Рускій Бурсі

Стоваришыня «Руска Бурса» в Ґорлицях просит до участи в поді на Ден Дітины. Одбуде ся она в Рускій Бурсі уж заран, т.є. в суботу 31. мая. А в єй рамках будут варштаты кропкуваня на лжыцях і лопатках та ріжны традицийны гры і забавы. Коло полудня, по пробі ансамблю Терочка, розпалиме огниско. Проєкт єст реализуваный завдякы дотациі Міністра Внутрішніх Справ і Адміністрациі. Красні просиме!