Голосник

Сумар дня на 31. жолтня/октобра 2019 р.

Приносиме вам сумар медияльной ґрупы ЛЕМ.фм+ на ден 31. жолтня/октобра 2019 р.

В Ліґници стрітили ся ведучы фольклорных фестівалів

В днях од 25. до 27. жолтня/октобра в Ліґници проходила стріча Порозумліня Фольклорных Фестівалів Західньой Польщы. Ґаздом подіі был Лемківскій Ансамбль Пісні і Танця «Кычера» при спілпрацы з Ліґницкым Центром Культуры. Серед присутных были орґанізаторы фестівалів з Пыжыц, Познаня, Зеленой Горы, Ґожова, Ліґниці і Ґоленьова. Гостьом был президент Ліґниці – Тадеуш Кжаковскій, і інчы повязаны з порозумліньом фестівалів. Темом стрічы была презентация тогорічных едиций поєдных фестівалів. Гості оповідали о своіх успіхах і проблемах. Дальше бесідувало ся о плянах на будучый рік, датах поєдных подій, ансамблях, можливостях спілпрацы. Вчас дводньовой стрічы запрезентували ся і локальны ансамблі – лемківскій колектив Кычера і польскій ансамбль Ліґниця. Ведено дискусиі м.ін. нт. промоциі фестівалів ци орґанізацийных справ. Юрий Стариньскій представлял історию і культуру Лемків, фестіваль «Світ під Кычером», а тіж вюл варштаты лемківскых танців.


Дорога 979 в околицях Ґорлиц закрыта од 4. листопада

Ґорлицкє Староство інформує, што од найблизшого понеділька, 4. листопада/новембра, закрыта буде для руху част дорогы 979. Ограничыня спричынене єст перебудовом перепусту вздолж реченой пути в Загірянах. Роботы будут ведены на крижівці в Квятоновицях. Староство інфромує, што обізд можливый буде через Ґорлиці, Стружівку і Мощаницю. Сама дорога до Квятоновиц буде переіздна. Передвидуваный час завершыня робіт, а тым самым одкрытя того одтинка дорогы, то конец листопада/новембра тр.


Четверговы Діалоґы в Пряшові

Орґанізация молоды.Русины пошырює інформацию про церковнославяньскы літургіі про молодіж і штотыжньову подію, так званы Четверговы Діалоґы. Інформация направлена єст на студентів середніх і высшых шкіл в Пряшові. Общество просит предовшыткым студентів грекокатоликів Русинів, любителів церковнославяньского і русиньского языків на Божескы Літургіі, якы служыти будут отці Василияне. Монахы в каждый робочый ден о 17.00 год. служыти будут про русиньску грекокатолицку молодіж літургіі по церковнославяньскы. Вчас богослужынь вшыткы чытаня зо Святого Писма, Апостола і проповіди будут в русиньскым языку. В суботу літургія буде о 8.00 год. рано. В неділю о 8.00 год. служена буде Утреня, а по ній Служба Божа. Окрем того Василияне просят каждый четвер на Четверговы Діалоґы, котры зачынати будут ся о 17.00 год. літургійом, а пак Малом Вечырньом, чытаньом зо Святого Писма, еґзеґезом, а наконец спільном дискусийом присутных з духовныма отцями. Літургіі будут служены в Василияньскым Монастыри при улици Ваяньского 31 в Пряшові.


«Лемківска Книжочка» выріжнена

«Лемківска книжочка» авторства Пауліны Бялковской і Анны Рыджанич была выріжнена в 4. Медженародным Конкурсі «Найліпше выдавництво о горах», якій был орґанізуваный в Кракові. Нагороды і выріжніня были вручены перед парома днями вчас Торгів Книжкы в Кракові. На них была і презентувана як раз «Лемківска книжочка» і інчы выданя од Фундациі Стара Дорога. «Лемківска книжочка» то інтересуюча публикация про наймолодшых. В простый спосіб приближат лемківскым дітям найважнійшы елементы нашой культуры. Книжока єст збогачена кольоровыма рисунками і описами поєдных елементів наприклад лемківского крою. Книжочку найдете в бібліотеці Руской Бурсы.


Перебудова дорогы Коростенко-Щавниця

Неодолга зачне ся перебудова повітовой дорогы Коростенко-Щавниця. В остатніх днях інвестор переказал пляц будовы выконавці. Плянувана модернізация то другій етап ремонту, якій має за ціль зліпшыти дорогове получыня Пєніньскых Нацийональных Парків. Ремонт обыйме одтинок од улиці Здройовой в Коростенку до границі з місцевістю Щавниця при Шляхтівскій Руси. Інвестиция фінансувана є з середків Евросоюзу, новоторжского повіту, ґміны Коростено і інчых. Роботы мают зачати як раз тепер, до кінця жолтня/октобра тр.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі