Сумар дня на 31. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 31. жолтня/октобра 2023 р.

Будова памятника на цмонтері в Вафці

На сайті zrzutka.pl мож підперти колекту Адама Вышовского на побудуваня памятника на цмонтері в Вафці. Од выселіня жытелів Вафкы в рамках акциі «Вісла» цмонтір лишил ся без опікы і од того часу нищіл. Деревяны кресты ся розлетіли, о похованых там Лемках лишыла ся уж лем памят. Зарадити тому хотят орґанізаторы колекты, котры на цмонтері плянуют поставити символичный памятник. Буде то трираменный крест на постументі зробленый з каменя з двоязычном інскрипцийом – по лемківскы і по польскы. Як подат орґанізаторы акциі, проєкт єст уж готовый, мают тіж кошторис і потрібны дозволіня, а до реализациі бракує фінансовых середків, не малых бо аж 30 тис. зл. Мотузок до колекты найдете на нашым сайті в днешнім сумарі або на сайті zrzutka.pl через вписаня наголовка «Будова памятника на цмонтері в Вафці».

zrzutka.pl

Набір внесків до урядового проґраму Охороны Забытків одкрытый

Міністер Культуры і Нацийональной Спадковины оголосил набір до другого етапу проґраму Охороны Забытків. До днес, 31. жолтня/октобра, мож складати внескы на реализацию задач плянуваных на 2024 р., до 31. марця 2024 рока мож ся зголосити до проґраму на рефундацию прац выконаных в роках 2021-2023. Цілю єст дофінансуваня задач звязаных з найбарже загороженыма та найціннійшыма забытками. Сут то м.ін. забыткы вписаны на Світову Листу Спадковины UNESCO, Памятникы Істориі та обєкты о вынятковым історичным, артистичным ци науковым значыню. Особливом цілю проґраму єст звернути увагу на забыткы о вынятковым значыню для культуровой спадковины, так в загальносвітовым контексті, як і локальным. О зворот коштів можут ся старати фізичны особы, єдиниці територияльного самоуряду, підметы злокализуваны на обшыри державы ци орґанізациі, котры опікуют ся забытком. Рефундация тыкат ся консерваторскых, реставраторскых ци будовляных прац проведеных протягом остатніх трьох років. Мінімальна квота дофінансуваня выносит 25 тис. зл., полный реґулямін і внесок находит ся на офіцияльным сайті Міністерства Культуры і Нацийональной Спадковины.

«Іскры Незалежности»

На Польковицкым рынку мож буде видіти інтерактивный і мобільный спектакль «Іскры Незалежности». Експозция находит ся в мобільній начыпі і што пару дни переміщат ся до наступного міста. Інтерактивный 20-минутовый спектакль презентуваный в середині вказує Полькы і Поляків, котры причынили ся до змін на світі в ріжных обшырях жытя. Експозицию мож буде обзерати од 4. до 6. листопада/новембра, вступне дармо.

«Бескідскы Дзяды»

Театральна ґрупа Племя та Ґмінный Центр Культуры в Устю Рускым уж по раз третій просят на спектакль «Бескідскы Дзяды». Пєса через остатні два рокы тішыла ся великом популярністю так серед жытелів Низкого Бескіду, як і туристів. В звязку з тым рішено повторити спектаклів. «Бескідскы Дзяды» мают в собі не лем елементы «Дзядів» Адама Міцкєвича, але і навязаня до «Бескідскых Хронік» Анджея Стасюка, «Пілбасні» Тадеуша Новака та «Бомбля» лемківского писателя Мирослава Нагача. Того рока Племя заплянувало аж пят спектаклів: 2.,3.,4. та 10. і 11. листопада/новембра о год. 18.00 в Высові.

«Музика Карпат в контексті волошскых міґраций»

Стоваришыня Res Carpathica та Публична Бібліотека Району Середмістя в Варшаві просят до участи в выкладі, якій вела буде др Юстина Чонстка-Клапита, пн. «Музика Карпат в контексті волошскых міґраций». Подія пройде 8. листопада/новембра о 18.00 год. в Центрі Інформациі ім. Яна Новака-Єзьоряньского. По прелекциі пройде презентация гры на народных інструментах.

fot. Plemię – międzypokoleniowa grupa teatralna