Сумар дня на 4. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 4. листопада/новембра 2021 р.

Просиме до Пшемкова

Уж в тоту суботу, 6. листопада/новембра, в Пшемкові одбудут ся XIV Стрічы Трьох Поколінь з Лемківском Культуром. Подія, котру орґанізує місцевый Кружок Стоваришыня Лемків, зачне ся о 16.00 год. Знаме уж тогорічных артистів, якы будут прикрашати імпрезу. Окрем ґаздів – дітячого ансамблю Ластівчата і ЛАПіТ «Ластівочка», на подіі запрезентує ся ансамбль з Лемковины – Терочка з Ґорлиц. Буде і мила несподіванка – по долгых роках специяльно на тоту подію реактивує ся ансамбль ДаМир, якій має в своім доробку єдну платню. XIV Стрічы Трьох Поколінь з Лемківском Культуром пройдут в Пшемківскым Осередку Культуры. Вступне дармо. Подія буде трансмітувана онляйн на фейсбуковым фанпейджы Стоваришыня Лемків, про тых, якы не зможут на ней быти.

Ре-Карпаты хоче выдати платню

Музична ґрупа Ре-Карпаты плянує выдати свою дебютантску платню. В тым році зачали нагрывати своі творы – мают іх 8. До выданя цедечка бракує ім лем фінансовой підпоры. В тій ціли зачала колекта грошы на сайті zrzutka.pl. На тот момент ґрупа зобрала близко 1,5 тис. з плянуваных 6 тис. зл. Ансамбль был основаный в 2016 р. і од самого початку лучыт традицийну карпатску музику (в тым лемківску) з джазом, фанком ци імпровізуваном музиком. Ансамбль до той поры заграл вельо концертів в Польщы і поза ньом. Ґрупу творят м.ін. Ґоша і Марек Тутко. В своім репертуарі мают вельо лемківскых співанок. Мож іх почути в інтернеті, а неодолга може і на плянуваній платни.

Вмер о. Мілян Ґерка

В віторок, 2. листопада/новембра, вмер в Пряшові православный священник о. Мілян Ґерка. Мал 76 років. Был секретарьом і говорцьом Святійшого Синоду Православной Церкви в Чешскых Землях і на Словациі. В минулым был і деканом Православной Богословской Факульты в Пряшові. Ґерка был і членом Митрополитарной Рады Православной Церкви на Словациі і ректором Православной Духовной Семінариі Православной Богословской Факульты Пряшівского Університету. Священник походил з русиньского села Ортутова. Отця Міляна Ґерку добрі знали Русины. Вельо разів чути го мож было в рамках духовных проповіди, котры мал про русиньскє высыланя Словацкого Радия, ходил і на русиньскы культурьны подіі. Часто помагал і при орґанізуваню подій в Словацкым Нацийональным Музею – Музею Русиньской Культуры в Пряшові. Завдякы ньому выникла в просторах русиньского музею в 2020 р. експозиция під назвом «Утверди, Боже – з істориі Православной Церкви на Словациі до 1948 р.». Вічна Памят!

Словацкій премєр при резервуарі Старина

В віторок, 2. листопада/новембра, премєр Словацкой Республикы Едуард Геґер стрітил ся з представниками реґіону Полонин в окресі Снина. Ішло о першу стрічу «рады нацийонального парку». Такы рады мают выникати по цілій Словациі. Як повіл премєр, при резервуарі Старина першый раз ся стрітил з робочом ґрупом, котра буде оцінювала задачы і Плян одновліня Словацкой Республикы в рамках реформы нацийональных парків. Реформа в Полонинах, за словами словацкого премєра, має ґарантувати і утриманя робочых місц. Проєкты мусят сполняти условія розвитку аґротуристикы. План обновы подля Геґера принесе еколоґічны рішыня, а єдночасно можливости, як піднести рівен жытя в каждым реґіоні.