Сумар дня на 5. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 5. грудня/децембра 2022 р.

Дальше неє вшыткых вступных даных Нацийонального Повселюдного Списуваня 2021

До 30. листопада/новембра тр. председа Головного Статистичного Уряду зобовязал ся передати вступны даны Нацийонального Повселюдного Списуваня 2021 тыкаючы нацийонально-етнічной структуры соспільства: нацийонально-етнічной приналежности і языка хоснуваного дома. На своім фейсбуковым профіли Лукаш Когут, посол до Европейского Парляменту і шлезскій активіста, в опубликуваным 2. грудня/децембра пості підкрислил, же в даных удоступненых 14 місяців од завершыня Списуваня не нашли ся одповіди на даны в ним звіданя. Подля опубликуваных даных – на понад 38 млн 36 тис. люди близко 33 млн 42 тис. подало выключно польску нацийональніст. Праві 856 тис. подало заєдно польску, як і непольску нацийональніст, а лем непольску нацийональніст – 391 тис. люди. Окремо вказана была «неокрислена» нацийональніст, яка чыслит 3 млн 748,6 тис. люди – то близко 10% вшыткых даных. Фурт бракує даных, якы бы конкретно підсумували одповіди на даны в Списі звіданя про нацийональніст і хоснуваный язык, вынятково важны для нацийональных і етнічных меншын, в тым лемківской. Посол Когут подал, што іщы раз попросил председу Головного Статистичного Уряду пояснити і вызначыти конкретный термін публикациі даных.

Штука Памятаня

Днес, з нагоды Медженародного Дня Волонтера, Нацийональный Інститут Спадковины орґанізує Ґалю Волонтерства – Разом для дідовизны, в часі якой першыраз буде запрезентуваный фільм пн. «Штука Памятаня» в режысериі Анны Урбаньчык. «Штука Памятаня» то образ документуючый діяльніст волонтерів проґраму «Разом для дідовизны» – участників волонтерского табору орґанізуваного Стоваришыньом Клюб Любителів Лемковины, веденого о. Романом Дубецом. Іх цілю є ратувати спадковину і памят по лемківскій культурі в малопольскым і підкарпатскым воєвідствах. Фільм вказує заанґажуваня локальной соспільности в ратуваня загороженой дідовинзы, дзвінниц лемківскых церкви, культуры, реліґіі, языка. Продукция буде доступна в сервісі Ютюб, на каналі Нацийонального Інституту Спадковины уж днес, од год. 17.30.

«Бескід без кіту. Зима» – номінация до нагороды Книжка 2022 Рока Польской Секциі iBbY

Книжка Мариі Стшелецкой пн. «Бескід без кіту. Зима», яку печатало влони выдавництво Лібра PL, была номінувана до літературной нагороды Книжка 2022 Рока Польской Секциі iBbY. До нагороды было номінуваных іщы 10 дальшых выдань. Тота сама книжка была номінувана не лем до літературной, але і ґрафічной нагороды Книжка 2022 Рока Польской Секциі іBbY. Публикация была выбрана за ілюстрациі і ґрафічне опрацуваня. Місце акциі книжкы то зимова Лемковина в 20. роках ХХ ст. Прочытаме в ній о дівчатках, котры глядают вітця – каменяря, што не вернул дохыж перед Різдвом. Фоном для іх подорожы сут дика природа Бескіду і штоденне жытя лемківского села. Публикация єст богато ілюструвана одбитками дереворытів, што были вытяты авторком з бескідской зваленой липы. Результаты конкурсу будут выголошены в часі торжественной Ґалі Польской Секциі іBbY, яка пройде 16. грудня/децембра в Варшаві.

Привернена з Выжнього Перевалу до колибы «Хатка Пухатка» на Ветлиньскій Полонині

Од 1. грудня/децембра привернена є траса жолтого шляку з Выжнього Перевалу до колибы «Хатка Пухатка» на Ветлиньскій Полонині. В рамках проведеных ремонтовых прац покрытя стежкы было утверджене і вырівнане, одновлене было і ознакуваня. Як подала дирекция Бєщадского Нацийонального Парку, перше вызначены трасы сут тепер закрыты. Працы при модернізациі колибы на Ветлиньскій Полонині были ведены од 2019 р. В рамках ремонту были змінены і трасы шляків. Модернізация «Хаткы Пухатка» і упорядкуваня туристичных стежок были зреализуваны в рамках більшого проєкту «Охорона біоріжнорідности Ветлиньской Полонины через охорону загороженых ґатунків перед неґативным влияньом туристикы».