Сумар дня на 5. мая 2025 р.

Приносиме вам сумар медияльной ґрупы ЛЕМ.фм+ на ден 5. мая 2025 р.

«Лемкы» – выстава фотоґрафій Р. Райнфуса і З. Потемпского в Саноку

Од 1. мая тр. в Музею Народного Будівництва в Саноку мож обзерати выставу фотоґрафій зробленых Здзіславом Постемпскым і Романом Райнфусом пн. «Лемкы». Знимкы походят з меджевоєнного періоду і воєнных часів. Вказуют сцены з жытя лемківскых соспільности – кадры презентуючы краєвиды лемківскых сел та портреты іх жытелів. Фотоґрафіі были позысканы з Ґалериі Фотоґрафіі Міста Ряшів та архіву Музею Народного Будівництва в Саноку. Выстава потырват до 31. жолтня/октобра тр. Мож єй обзерати в будинку нр 14, находячым ся на Ґалицийскым Рынку, в годинах одкрытя музею.

Новы атрациі на Парковій Горі в Креници

В минулый вікенд на Парковій Горі в Креници одкрытый был першый елемент нового комплексу Водного Пляцу Забав. Інформувал о тым бургомайстер Крениці Пьотр Рыба. Уж тепер мож корыстати з нового скалодрому, а од початку червца/юнія одкрытый буде вельофункцийный будинок зо шкляным дахом, з котрого буде мож обзерати ляндшафты і напити ся кавы. Іщы перед початком літніх вакаций рушат тіж водны атракциі. Кошт побудуваня новых атракций то близко 7 млн злотых. То дополніня істнуючых там уж Загорід Сил Натуры. Дотля на Парковій Горі в рамках Загорід Сил Натуры были одкрыты видокова плятформа, силовня під хмарком, спацеровы алейкы ци мініятуры найбарже характеристичных креницкых обєктів. Окрем того на ділянках арендуваных од ґміны Крениця фурт поступуют працы при Поляні Музикы і Світла. Інвестор, Польскы Кабельны Желізниці (PKL) і креницкы власти рахуют, што удоступніня цілой оферты заохотит одвиджати іщы векше чысло туристів і жытелів. Окрем того PKL інвестує і в оферту на Креницкій Яворині, де так само в минулый вікенд одкрыта была нова атракция для діти – мотузковый парк находячый ся пят метрів над земльом.

«Потятка, сироты і Вівіенн» в Дому Нацийональных Меншын в Празі

Од 1. мая в просторах Дому Нацийональных Меншын в Празі мож обзерати выставу Вівіенн Варґовой, артисткы з русиньскыма коренями. Вівіенн Варґова народила ся в баницкым місті Ґельниця на східній Словациі. Близко пят років жыла в Лондоні. Тепер жыє в Празі, де своі русиньскы корені мішат з русиньскыма коренями ексцентричного артисты Норберта Тапперта, якій так само походит зо східньой Словациі. В Празі мож видіти выставу під назвом «Потятка, сироты і Вівіенн», котра є єй першом персональном выставом. Як раз в тых просторах Вівіенн і Норберт в 2023 р. зробили выставу, котра мала назву «Близкы стрічы руснацкого ступеня», парафразуючы культовый фільм Стівена Спільберґа «Близкы стрічы третього ступеня». На своій першій персональній выставі Вівіенн Варґова представлят творчіст техніками коляжу і акрильового монопрінта за послідній рік. Вернісаж выставы одбуде ся днес, 5. мая о 18.00 год. Выставу в Ґалериі Дому Нацийональных Меншын в Празі мож видіти до 15. мая тр.