Сумар дня на 6. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 6. грудня/децембра 2023 р.

Уж лем рішыня і зачынают будову С19

До підкарпатского воєвды трафил внесок выдати рішыня о позволіню зреалізувати дорогову інвестицию, што тыкат експресовой дорогы С19 на одтинку Дукля-Барвінок – подала пресова передставничка ряшівского одділіня Головной Дирекциі Державных Доріг і Автострад Йоанна Рарус. Підкрислила, што рішыня уможнит зачати будову дорогы, котра буде частю шляку Via Carpatia. Вартіст контракту на будову 18-кілометрового одтинка выносит 1,5 млд зл. Згідні з підписаным догваріньом з фірмом Polaqua, будова дорогы має быти закінчена в ІІ чвертці 2027 рока. Выконавця опрацувал уж необхідну документацию конечну до будовы дорогы та до початку компенсацийной процедуры за перениманы Скарбом Державы нерухомости. Траса медже Дукльом а Барвінком іде в беспосереднім сусідстві з границьом державы, єст то єден з найтяжшых одтинків експресоовй дорогы С19 під оглядом ґеолоґічной будовы і середовисковых условій.

Містны обходы Дня Копальника в Польковицях

Як сме подавали в скоршых новинах, в Польковицях Ден Копальника, што припадат на 4. грудня/децембра, зачали праздунвали уж в суботнє пополудне. В понедільок торжества были продолжаны. Традицийні по богослужыню в костелі св. Варвары в інтенциі копальників і іх родин самоурядовы делеґациі, делеґациі зо шкіл та, предовшыткым – делеґациі копальників, зложыли квітя перед памятником «Копальникам Польской Міди». Себастиян Сыпко, заступця бургомайстра до господарчых справ, повіл, што є то єдно з найвашнійшых свят, передал тіж желаня для копальників – тілько само зъіздів, што і выіздів. Того самого дня прошла тіж копальнича академія зорґанізувана в Основній Школі но 1 ім. Яна Выжыковского в Польковицях.

Бугромайстер Ґорлиц Рафал Кукля нагородженый

В пятницю 1. грудня/децембра прошла Велика Ґаля Польского Підприємства 2023, вчас котрой вручыли нагороды в Загальнопольскым Плебісциті Орлы Мальопольского Самоуряду, орґанізуваным Загальнопольском Федерацийом Підприємців і Працодавців – Przedsiębiorcy.pl. Тогорічна ґаля была о тілько выняткова, бо ювілейна. Вчас подіі статуя «Орел 15-літя» трафила в рукы бургомайстра Міста Ґорлиці Рафала Куклі. Нагороджены Орлом, як подає капітула: «вызначают найвызшы стандарды, сут символьом розвитку і ефективности в заряджаню реґіоном». Нагороду признают в рамках Загальнопольского Проґраму Силюет і Маркы Польского Самоуряду, котрого цілю є будуваня і підпераня позиций польскых самоурядів та промуваня іх досягнінь в поєдных обшырях діяльности, што перекладат ся на атракцийніст реґіону і будувня сильной маркы.

Лемківска штука в Коросні

Oд найблизшой пятниці 8. грудня/децембра в Етноцентрі Коросняньской Землі буде мож обзерати выставу пн. «Внутрішній і зовнішній простір. Образ Лемковины в сучасній штуці». Буде то выбір робіт од лемківскых і польскых артистів. Як подає в анотациі выставы єй куратор – Михал Шымко: «буде то оповіст о памяти і єй універсальности в контексті творіня сучасной лемківской достоменности». Наголовковый зовнішній і внутрішній простір односит ся предовшыткым до особистой (внутрішньой) і материяльной (зовнішньой) сферы соспільного жытя. Презентуваны працы лемківскых і польскых творців улокуваны сут медже тыма двома протиставныма сферами і оперуют на чымси в роді посередньой обшыри. Выстава буде нагодом, жебы в єдным місци і часі пообзерати творы слідуючых артисток і артистів: Давида Здобыляка, Анны Мариі Зиґмунт, Богдана Карела, Евеліны Коґут, Теодора Кузяка, Мажены Майкы, Володислава Ревака, Андрия Сухорского, Йоанны Спяк, Миколая Федака, Катажыны Шведы, Якуба Якубовича, а тіж – Михала Шымко.