Приносиме вам сумар медияльной ґрупы ЛЕМ.фм+ на ден 6. листопада/новембра 2019 р.
Дорога перез Перегринку вкінци переіздна
По місяцях утруднінь і обіздів привернено рух через Перегримку – скінчено ремонт двох дороговых переправ. Мож уж без перешкід переіхати мостами на воєвідскій дорозі 993 Ґорлиці-Новый Змигород. Дороговці оддали 31. жолтня/октобра в Перегримці, в ґміні Осєк Ясельскій, два новы мосты. В рамках перебудовы дорогы поставлено міст на потоку Клопітниця разом з доіздами і збудувано необхідну технічну інфраструктуру в селі. Другом частю было розобраня істнуючого мосту в Перегримці і побудуваня нового. Переізд через місцевіст был утрудненый през піл рока.
Студенты з Росиі ремонтували цмонтері в Мыковій
Ґрупа десятьох студентів з Перму, в Росийскій Федерациі, одновила два воєнны цмонтері з І світовой войны, котры находят ся в русиньскым селі Микова, в окресі Стропків. Студенты, якы сут членами Пермского Воєнного Історичного Клюбу «Восточный Рубеж», уж од парох років спілпрацуют з Клюбом Вояків Гуменне. Цілю студентів было прити до місц, де без похыб похоронены сут росийскы воякы або офіцеры. Такым є як раз Микова. Як подал шолтыс місцевости – Душан Джула, село не має грошы, жебы утримувати цмонтері, од Міністерства Внутрішніх Справ достає 150 евро на рік на кошыня. На єдным з цмонтерів студенты одстранили пліт, вымінили центральный крест і дали новы кресты. На другым натерли істнуючы кресты, а на центральный дали памятну таблицю. Разом на обох могылах похороненых є 15 росийскых вояків і 11 австро-угорской арміі. Іщы перед тым як студенты пришли до Миковы, зробили з ахівів список вояків з листопада/новембра 1914 рока, котры воювали на тій териториі. Намагают ся, жебы створити порталь, на якым родины будут мочы находити, де іх близкы-жолніры сут похоронены.
Штефан Штец просит на серию концертів
Харизматичный русиньскій співак Штефан Штец зачынат днес турне по словацкых містах. Вєдно зо свойом ґрупом Файта представлят публиці новости і несподіванкы з рыхтуваного альбому пн. «Дує вітер», котрый выйде кінцьом рока. Певністю презентуваны на выступах будут і найбільшы гіты співака. На концертах окрем Штефана Штеця выступувати будут тіж запрошены гості. Першый концерт проходит днес в Кошыцях, дальше – 9. листопада/новембра Штефан Штец выступит в Пряшові, а 24. в Зволені. В грудни/децембрі артиста плянує дати іщы єден выступ в рамах того турне – 7. выступит в Снині.
Рыманів найліпшым спа?
Курорт Рыманів находит ся в ґрупі фіналистів єдиного польского конкурсу направленого на курорты – Еко Гестия Спа. Выгране місточко отримат 100 тис. зл. Грошы буде мож схоснувати выключні на проєкты і діяня звязаны з охороном середовиска. Фіналисты отримают тіж річну секурацию од середовисковых шкід. В конкурсовій комісиі засідают не лем представникы орґанізаторів, а тыма сут Стоваришыня Курортных Ґмін ПР та Ґрупа Ерґо Гестия, але тіж академіцкы выкладовці, дослідникы і досвідчены самоурядовці. Оціняны сут долготерміновы діяня, інвестициі і ініциятивы для еколоґіі, охороны середовиска та едукациі локальных соспільности. В трьох попередніх едициях участ в конкурсі брали 23 курорты, лавреатами были Унєюв, Буско та Іновроцлав. Того рока серед фіналистів сут окрем Рыманова: Рабка, Быстриця Клодска та Льондек Здрій. До Стоваришыня Курортных Ґмін польской державы приналежат м.ін. ґміны Санкова, Устя Рускє, Мушына, Крениця та Івонич.
Коментарі