Сумар дня на 6. мая 2026 р.

Приносиме вам сумар медияльной ґрупы ЛЕМ.фм+ на ден 6. мая 2026 р.

Писали матуру з лемківского языка!

Од понеділька в Польщы проходят матуральны іспыты – значыт еґзаміны на закінчыня выжеосновной школы. За абітуриєнтами середніх шкіл два обовязковы еґзаміны на основным рівни знаня – з польского языка і з математикы, днес здаваный єст обовязковый еґзамін з выбраного чужого языка. Додатково – вчера проходил еґзамін з лемківского языка. Што цікаве, декляраций здаваня было аж шіст. На момент редаґуваня новин потвердили сме, што реальні до еґзаміну підышло двоє матуристів – єдна особа в украіньскым ліцею в Перемышли, друга – в ліцею в Ґлоґові. Єдном з тых двох одважных осіб є Зузанна Прокопчак з Ґлоґова. Сердечні ґратулюєме! О дрібницях еґаміну поінформуєме заран.

«Прикликаня. Лемковина в діалоґу штукы і поколінь» – выстава в Ряшові

В Ряшові буде одкрыта выстава малярства «Прикликаня. Лемковина в діалоґу штукы і поколінь». Експозиция презентує роботы двох артисток – Марты Криницкой-Ожех і Барбары Губерт, котрых творчіст одкликує ся до памяти і культурной спадковины погранича полудньово-східньой Польщы. Марта Криницка-Ожех, абсольвентка Выділу Штукы Ряшівского Університету, сігат в своіх образах до лемківскых корени, трактуючы іх як пункт выходу до рефлексиі над культурном памятю. Барбара Губерт, абсольвентка Академіі Красных Штук, піднимат тему неістнуючых сел заляных водами Солиньского Озера – прібує вернути іх шыршій свідомости. На выставі запрезентуваны будут новы циклі робіт обох артисток, посвячены памяти місця і єй сучасній інтерпретациі. Вернісаж выставы одбуде ся 8. мая о 18.00 год. в Воєвідскым Домі Культуры в Ряшові.

«Мумінкы» по лемківксы? Поможте выдати книжку

Тырват колекта середків, жебы выдати тлумачыня на лемківскій язык книжкы «Малы тролі і велика повін» авторства Туве Янсон – першой з сериі о славетных Мумінках. Цілю ініциятивы є розвивати і промувати лемківскій язык, особливо серед наймолодшых чытачів. Переклад зробит Петро Криницкій, знаный з тлумачынь світовой літературы на лемківскій язык. Перевюл м.ін. «Малого Прінца», «Віні Пу» ци «Звірячу фарму». Зобраны грошы підут на закуп ліценциі, коректу і редакцию тексту, склад і друк 500 примірників в твердій окладинці. Орґанізаторы рахуют, што публикация стане ся початком для цериі книжок для діти, а печатаня каждой наступной буде фінансувала попередня. Колекта на сайті zrzutka.pl потырват іщы через найблизшы тыжні, а печатаня книжкы плянуване єст найпізнійше на осін того рока.

Репела, Мурянка, Грабан – в новій книжці од Падяка

Вказала ся нова університетска книжка посвячена сучасній лемківскій літературі. Авотром хрестоматіі єст літературознавця і выкладовця Університету в Пряшові, доцент Валерий Падяк. Книжка під наголовком «Лемківскій триптих на выгнаню. Сучасна поезия Русинів з Польщы» была зрытувана з думком о студентах русиньскых одділінь на університетах в Европейскій Уніі. Публикация выникла в наслідстві академіцкых выкладів веденых в Інституті Русиньского Языка і Культуры в Пряшові і презентує доробок трьох поетів: Нестора Репелы, Петра Мурянкы і Владислава Грабана. Каждый з творців єст представленый в окремым інтерпретацийным контексті, разом з біоґрафійом і выбором поетицкых текстів. Автор публикациі підкрислят, што наголовкове «на выгнаню» односит ся до досвідчыня выселінь Лемків з 1947 рока і становит ключ до інтерпретациі сучасной лемківской літературы як рефлексиі над втратом вітчызны і достоменности. Книжка была печатана в выдавництві Валерия Падяка, при підпертю лемківскых орґанізаций з Америкы і Капратского Медженародного Інституту в Гіґґанум в ЗША.