Сумар дня на 7. мая 2026 р.

Приносиме вам сумар медияльной ґрупы ЛЕМ.фм+ на ден 7. мая 2026 р.

Матура з лемківского

Тырвают матуральны іспыты. Передвчера, в віторок, была здавана матура з лемківского языка. Подля інформаций отриманых з Центральной Еґзамінацийой Комісиі, деклярацию писати матуру з лемківского подало 6 осіб, але до еґзаміну підышли 3 особы. Матура была писана в Ґлоґові, Вроцлаві і Перемышли. Традицийно уж на матурі треба было зрыхтувати выпрацуваня на єдну з двох поданых тем. Перша з них то: «Як в літературі представляны сут Русины/Лемкы? Порівнай способы іх описуваня в вершах Александра Духновича Я Русин і Івана Русенкы Лемкы». Друга тема то: «Ци історичны подіі можут інспірувати творців? Розваж проблем, одкликуючы ся до фраґменту допису Наталиі Малецкой-Новак «Голос». Медже фольклором а формом і выбраного тексту з лемківской літературы». Ґратулюєме тогорічным матуристам і желаме успіхів!

Промоцийна стріча книжкы «Талергоф. Лаґєр інтернуваня Русинів»

Коросняньска Публична Бібліотека разом зо Стоваришыньом «Руска Бурса» в Ґорлицях кличут на промоцию книжкы «Талергоф. Лаґєр інтернуваня Русинів» та стрічу з авторами. Подія одбуде ся днес – 7. мая о 17.00 год. в Головній Чытальни КПБ. Книжка, выдана в 2025 р. Стоваришыньом «Руска Бурса» в Ґорлицях, є збірником дописів присвяченых австрийскому лаґрови інтернуваня в Талергофі, де в 1914 р. была поневолена русиньска інтеліґенция. Публикация єст в цілости по польскы і находят в ся в ній рефераты участників конференциі, яку в 2024 р., в 110. річницю початку поневолінь зрыхтувало Стоваришыня «Руска Бурса» в Ґорлицях во спілпрацы з Музейом Дворы Карвациянів і Ґладышів в Ґорлицях. Зобраны в томі тексты походят з ріжных бадавчых порядків i вказуют Талергоф як вельовымірове явиско. Домінуют історичны дописы, дополнены анализом джерел, рефлексийом над памятю. Не достаєме єднорідной синтезы, радше панораму проблему. Выданя обогачене єст цінныма материялами – документами і фотоґрафіями, а тіж дополнене о додатковы тексты, што пошырюют підняту проблематику заєдно о дослідничу, як і спільнотову перспективы, нп. сут реляциі з Общелемківского Поломництва до Талергофу з 2024 р. Книжка чыслит близко 400 стран. В часі днешньй стрічы буде мож купити книжку в промоцийній ціні.

Неодолга Бієнела – RuthenAle

Стоваришыня Лемків неодолга зорґанізує першу зо своіх тогорічных подій. В днях 23.-24. мая одбуде ся 13. Бієнале Лемківской/Русиньской Культуры – RuthenAle. На подіі, яка проходит што два рокы, стрітят ся в родакы з ріжных держав. Першый ден подіі пройде в Креници, а другій – першыраз в Высовій. Дальше, в днях 31. липця/юлия – 2. серня/авґуста буде проходила 46. Лемківска Ватра на Чужыні в Михалові. Осіню одбудут ся Лемківска Творча Осін, Стрічы з Лемківском Культуром в Ґожові Великопольскым і Стрічы Трьох Поколінь з Лемківском Культуром в Пшемкові і Любіні.

Фестіваль Русинів в Камюнці

Кінцьом мая в селі Камюнка на Пряшівскій Руси одбуде ся дальшый річник Фестівалю Фольклору Русинів Словациі Камюнка. Подія пройде в днях 30.-31. мая в природным амфітеатрі Дубне. Як подают орґанізаторы, традицийный фольклорный фестіваль, котрый лучыт Русинів зо Словациі і заграниці, буде в Камюнці уж 61. раз. І в тым році оферує атракцийный проґрам і цікавы товаришучы подіі. Орґанізаторами подіі сут Русиньска Оброда на Словациі, Село Камюнка, Любовняньскій Освітній Центр і орґанізация молоды.Русины. Неодолга представлены нудут проґрамовы блокы, выконавці і дальшы фестівальовы новинкы.