Приносиме Вам сумар медияльной ґрупы ЛЕМ.фм на ден 7. серпня/авґуста 2019 р.
В неділю ювілей высівского здрою і мінеральной воды
В найблизшу неділю, 11. серпня/авґуста, в Высовій пройде ювілей 60-літя місцевого здрою – «Высова С.А.», і 70-літя натуральной мінеральной воды «Высовянка». Орґанізаторы зрыхтували богатый проґрам той цілодньовой акциі. Буде він проходил в здройовым парку. Подія зачне ся о 14.00 год. Хоц днешній здрій святкує 60. річницю фунґуваня звязку, то свойом традицийом навязує до 1882 рока – даты, котру бере ся за офіцияльне одкытя здрою. З другого боку треба памятати, што традиция лікуваня і одпочываня в Высовій сігат аж XVIII столітя.
Через три дни буде одкрытый польско-украіньскій перехід
З нагоды Дни Добросусідства Польщы і Украіны три дни, од 8. до 10. серпня/авґуста, одкрытый буде тымчасовый, польско-украіньскій граничный перехід Лубня-Волосате в Бєщадах. Є то добра інформация особливо для любителів гірской туристикы. Державну границю буде можна перейти піше або на біциґли подля такых самых принципів, якы обовязуют на нормальні фунґуючых переходах. Полякы і громадяны ЕУ мусят мати при собі пашпорты, а Украінці біометричны пашпорты або пашпорты з візом Шенґен. Неє і обовязку вертати того самого дня тым самым переходом, можна перейти границю в Волосатым, а пак вернути до Польщы інчого дня якым-небуд граничным переходом. Є то уж дальше того рока одкрытя часового граничного переходу в тым місци – перше было в маю. Як інформувал Бєщадскій Одділ Граничной Стражы, одправлено товды 2860 туристів – головно громадян Польщы і Украіны, але тіж Німец, Мадяр та ЗША.
Днес премєра пєсы «ЄМ ПАМЯТЮ»
Уж днес в Ґорлицкым Центрі Культуры о 19.00 год. одбуде ся премєра спектаклю під наголовком «ЄМ ПАМЯТЮ», якій єст подорожом по істориі Лемків, експедицийом до середины іх маґічного світа леґенд та звыків, поворотом до часу, коли кажда гора і каждый камін оповідали свою історию. Пєсу зрыхтувано нa пограничы артистичных та соспільных діянь, анґажуючы професийных театральных творців і місцевых люди. Од червця/юнія до серпня/авґуста досліджано памят тыкаючу Лемків. В результаті створено спектакль, якій має елементы драматичного театру, театру танця і мультімедияльного видовиска. Його сценаристом та режысером є Войтек Фаруґа. Пєсу зреалізувано в рамках проєкту «Лемківска Одисея». Дальшы показы одбудут ся 9. серпня/авґуста в Яслі, 11. зас в Ґорлицях та 22. в Коросні. Вступне дармо.
Ластівочка з другым оцініньом
Як сме інформували деякій час тому, Лемківскій Ансамбль Пісні і Танця «Ластівочка» з Пшемкова, котрый діє при місцевым Кружку Стоваришыня Лемків, был оціненый вчас 53. Загальнопольского Фестівалю Капель і Народных Співаків в Казімєжу. Товды же Ластівочка заняла 3. місце в катеґориі співочых ансамблів. Жырі доцінило і члена хору, співака Данька Горощака, якому признано третю нагороду в катеґориі солистів. Тепер хочеме заявити, што колектив брал участ в 27. Загальнопольскым Співочым Фестівали «Земля і Пісня» в Шпротаві, якій проходил в днях од 5. до 7. липця/юлия. Подібні як в Казімєжу, на подіі презентувала ся співоча ґрупа ансамблю, котра так само представляла богатство народного лемківского співу. Grand Prix фестівалю в катеґориі традицийного співу отримала як раз Ластівочка. Фондатором головной нагороды, котра трафила в рукы лемківского колективу, был Шпротавскій Дім Культуры. Окрем лемківского хору, вчас фестівалю оціненых было і вельо польскых ансамблів.
Коментарі