Сумар дня на 8. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 8. квітня/апріля 2021 р.

В Білянці похоронили Павла Стефановского

В віторок, 6. квітня/апріля, в Білянці одбыл ся похорон бл. п. Павла Стефановского, заслуженого лемківского діяча, поеты, писменника і етноґрафа. Похорон проходил в місцевій православній церкви, пак тіло покійного было зложене до землі на місцевым теметові. Попращати покійного окрем родины, сусідів і знаємых пришли представникы лемківскых орґанізаций. Од імени Стоваришыня Лемків голос забрали др габ. Олена Дуць-Файфер та Петро Трохановскій. Стоваришыня «Руска Бурса» в Ґорлицях репрезентувал Павел Малецкій, член Заряду. Пращальне слово повіл тіж Ярослав Трохановскій, долголітній сусід Покійного і Маестро ансамблю Лемковина. Од імени Лемківского Ансамблю Пісні і Танця «Кычера» в Ліґници. Покійного попращал його ведучый Юрий Стариньскій. Музей Лемківской Культуры в Зындрановій репрезентувал ведучый музею Богдан Ґоч. Присутны были і члены проукраіньской орґанізациі Обєднаня Лемків. Од імене Округового Музею в Новым Санчы лист прочытал Збіґнєв Волянін. Покійного Павла Стефановского хоронили отці Володислав Канюк з Ганчовы та місцевый парох Андрий Ґрич. Од імени родины слово мал сын Покійного – Штефан Стефановскій. На конец вызвучала патріотична пісня «Горы нашы».

Віртуальный спацер по Конечній

Днес о годині 10.15 проходит вірутальный спацер по лемківскым селі Конечна. Стрічу онляйн веде др Ігор Ксенич з Інституту Европейской Культуры Університету Адама Міцкєвича в Познані, якого рід выходит як раз з того села. Прелеґент постарат ся одповісти м.ін. на звіданя, чом в тым селі находит ся двоязычна, польско-лемківска таблиця з назвом місцевости та чом граничный перевал зове ся Дуява. Подія реализувана єст в рамках факультативного блоку «Приближыня: Лемковина на стыку культур», котрого участниками сут студенты ІІ року европейской комунікациі. Акция буде проходила на фейсбуковым фанпейджы модулу під назвом: „Przybliżenia: Łemkowszczyzna na styku kultur”. Подія єст публична, каждый може взяти в ній участ.

Свидник поділил дотациі

Дотациі в цілковитій сумі 116 тис. евро розділили свидницкы містецкы посланці на своім остатнім засіданю. Фінансы могли быти приділены лем для орґанізаций, якы фунґуют веце як два рокы. За словами пріматоркы міста Іванчовой найвекшы сумы реґулярно отримуют колективны спорты, значыт екстраліґовый містецкій клюб волейболь, клюб футболю, але грошы отримал тіж наприклад і гокейболь ци клюб карате. На вшыткы спортовы активности місто розділило 83% з цілковитой сумы. Част дотаций пішла на громадскы орґанізациі. Наприклад для люди, якы хворіют на цивілизацийны хвороты, або для фольклорного ансамблю Маковиця, котрый подля пріматоркы барз добрі репрезентує місто Свидник.