Сумар дня на 8. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 8. листопада/новембра 2021 р.

Ремонт повітовой дорогы нр 1510 К Берест-Мохначка Выжня

Як поінформувал Повітовый Заряд Доріг в Новым Санчы, в днях од 8. до 10. листопада/новембра тр. в годнах од 9.00 до 18.00 будут ведены роботы звязаны з ремонтом повітовой дорогы нр 1510 К Берест-Мохначка Выжня в місцевости Чырна. В звязку з тым дорога буде закрыта 8. листопада/новембра од крижівкы з ґмінном дорогом до Ізб до границі Чырной і Мохначкы Выжньой, та в днях 9. і 10. листопада/новембра на одтинках в Перунці і Чырній. Пропонуваный обізд іде державном дорогом нр 75 і воєвідском дорогом нр 981. Залежно од хвилі термін закрытя дорогы може быти зміненый.

Уж 37 словацкых реґіонів обнятых чорном зоном

На Словациі фурт росне чысло зараженых коронавірусом. З той причыны в державі збільшат ся чысло реґіонів обнятых чорном зоном. Од днес, 8. листопада/новембра, в чорній зоні находит ся аж 37 реґіонів, дотля было іх 24. Сут в ній вшыткы реґіоны, якы граничат з Польщом. В чорній зоні єст обовязок закрывати масочком ґамбу і ніс. Діяльніст мусят закрыти готелі, клюбы фітнес ци басены. Вхід на масовы імпрезы або до бібліотекы мают лем особы, котры приняли вакцину, хворіли Covid-19 або мают неґативный результат тесту. Ґастрономія діє для вшыткых лем на вынос. Найбарже ограничены сут особы без вакцины. Закрыте єст для них вшытко окрем склепів з ідлом, аптык і лікаря, але і тому товарышат ограничыня. В склепах і місцях реліґійного культу може ся находити лем єдна особа без вакцины на 25 м2. Словацкій міністер здоровля Владимір Ленґварскій не выключат введіня барже риґористичных контролі, а в реґіонах з найгіршом епідемійолоґічном ситуацийом введіня додатковых ограничынь.

«Бескідскы Дзяды» в Высовій

В вікенд 6.-7. листопада/новембра в Высовій мож было обзерати премєру спектаклю зрыхтуваного Театральном Ґрупом Племя з Устя Руского. Пєса пн. «Бескідскы Дзяды» мала в собі не лем елементы «Дзядів» Адама Міцкєвича, але і навязувала до «Бескідскых Хронік» Анджея Стасюка, «Пілбасні» Тадеуша Новака та «Бомбля» лемківского писателя Мирослава Нагача. Театральну ґрупу «Племя» покликала до жытя Моніка Бабуля. Бабуля єст авторком сценария, разом з Мариюшом Лясковскым вырежысерувала пєсу. За музику в спектаклю одповідат Мирослав Боґонь. Пєса єст пробом прикликаня істориі о вмерлых особах звязаных з реґіоном Низкого Бескіду і єдночасно великом афірмацийом жытя. Окрем театральной ґрупы на сцені выступили Ґалицийскій Хор під дириґентуром Едиты Сулімской і дута оркєстра під дириґентуром Романа Корбича.

Контрольне досліджыня оцінит якіст даных зобраных в Повселюдным Списуваню 2021

Од пятниці, 12. листопада/новембра, до середы, 24. листопада/новембра тр., в цілій Польщы ведене буде контрольне досліджыня, што має на ціли оцінити блуд покрытя і оціну якости даных здобытых в недавно завершеным Нацийональным Повселюдным Списуваню Жытелів і Мешкань 2021. Контрольне досліджыня буде проведене на припадково выбраній пробі 100 тис. мешкань списаных працівниками статистичных урядів. Його результаты мают м.ін. помочы зліпшыти методолоґію будучых списів. Досліджыня буде мало форму телефонічной бесіды. В малопольскым воєвідстві бесіды будут вести лем працівникы Статистичного Уряду в Кракові. Іх ідентичніст мож буде потвердити на стороні spis.gov.pl або специяльній інфоленіі. Участ в контрольным досліджыню єст обовязкова, а отриманы в ним даны сут правні хоронены і обняты статистичном таємницьом.