Сумар дня на 8. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 8. вересня/септембра 2023 р.

«Бєщады і Полонины без границ»

До днес Бєщадскій Нацийональный Парк жде на опініі і увагы вшыткых заінтересуваных темом удоступняня хороненых обшыри для осіб з руховыма неполносправностями, спіпых або планно видячых. Соспільны консультациі сут частю рыхтуваня через БНП трансграничного проєкту з проґраму Інтерреґ Польща-Словация 2021-2027, довєдна з Нацийональным Парком Полонины по словацкій страні. Цілю проєкту єст введіня дедикуваных розвязань в обшыри доступу до обох парків, якы сут важном частю Медженародного Резервату Біосферы «Східні Карпаты». До резервату належат так цінны скарбы натуры, як комплексы буковых пралісів і гірскы східньокарпатскы лукы званы полонинами. Єдным з ціли резерватів, установленых UNESCO, єст досліджаня реляциі медже чловеком а природом, та спераня зрівноваженого жытя і розвитку обшыри. Як подає БНП, знают, же «при дальшым плянуваню розвитку обшыри Східніх Карпат необхідне єст увзглядніня специфікы, в тым переплітаючой ся західньой і східньой культуры, особливо в виді деревяной сакральной і світской архітектуры, воєнных подій і вельох інчых». Заінтересуваны том темом можут іщы днес присылати заувагы електронном почтом. Дрібниці на інтернетовым сайті Бєщадского Нацийонального Парку.

Дальша едиция прятаня першовоєнных цмонтерів

О місяц, в днях од 5. до 7. жолтня/октобра одбуде ся VIII акция прятаня цмонтерів з І світовой войны. До участи в подіі просят председа кружка PTTK нр 8 – Гірского Клюбу «Орлы» при Столичній Коменді Поліциі, бургомайстры міст Біч, Бобова, Тяжковиці, Ґорлиці та війтове ґмін Ґорлиці, Крампна, Липинкы, Лужна, Мощениця, Ропа, Санкова і Устя Рускє. 3 дни будут порядкуваны 93 першовоєнны цмонтері, якы ся находят на обшыри обнятой тогорічном акцийом. В посліній ден робіт в Ґорлицях пройде підсумуваня акциі, котрому буде товаришыла выстава фотоґрафій Вальдемара Добровольского пн. «Ґалицийскы цмонтері – пізріня по 100 роках». Почестный патронат над акцийом тримают малопольскій воєвода, ґенеральный консуль Австриі в Кракові, ґенеральна консуль Словацкой Республикы в Кракові, ґенеральный консуль Мадяр в Кракові і головный комендант поліциі.

Варштаты писаня ікон в Команчы

Ґмінный Осередок Культуры в Команчы просит молодіж і дорослых до участи в варштатах писаня ікон. В іх рамках одбудут ся дві стрічы – в четвер 14. і в суботу 16. вересня/септембра од 16.00 год в Сельскым Клюбі в Чыстогорбі. Занятя сут безплатны, але зато же чысло місц єст ограничене, обовязуют скоршы записы. Варштаты сут реализуваны в рамках проєкту пн. «За карпатскыма звыками і традициями» з проґраму Народна і традицийна культура і дофінансуваны з середків Міністра Культуры і Нацийональной Спадковины з Фонду Промоциі Культуры.

Дармова вода для ґорлицкых школярів

Еколоґічна акция в ґорлицкых школах – доступ до дармовой воды для діти має сперти звыкы здорового іджыня, але і ограничыти корыстаня з плястіковых фляшок. Разом з початком шкільного рока в Містных Компґлексах Шкіл были заінсталюваны краны, што запевняют доступ до безплатной, якістной воды до питя. Акцию сфінансували місто Ґорлиці, Містне Підприємство Комунальной Господаркы і Фірма Емполь. До каждого ученика трафит тіж вельоразова фляшка на воду з лоґо Міста Світла.