Сумар дня на 9. липця/юлия 2026 р.

Приносиме вам сумар медияльной ґрупы ЛЕМ.фм+ на ден 9. липця/юлия 2026 р.

15. Русиньска Ватра в Малым Липнику

Уж заран загорит 15. Русиньска Ватра в Малым Липнику, яку рыхтує орґанізация молоды.Русины. Проґрам зачне ся о 18.00 год. выступами дітячых фольклорных ансамблів. Пак буде перегляд лавреатів і участників послініх річників конкурсу Співы мого роду, і проґрам з назвом Вечер русиньскых голосів. Ден завершыт ся вечерньом забавом. Суботній ден ватры зачне ся о год. 16.30 «Мозаіком Реґіону» – проґрамом фольклорных колектівів з реґіону і близкой околиці. Дальшы ансамблі запрезентуют ся пак в проґрамах «Витайте, сусіды» і «В кругу жывота». Ден завершыт гуляня. Окрем того в рамках товаришучого проґраму буде мож скоштувати традицийны стравы з реґіону, взяти участ м.ін. в варштатах народной вышывкы ци сітодруку. Буде тіж школа танця, выстава фотоґрафій і активности про діти. В неділю рано в храмі свв. Космы і Даміяна правлена буде торжественна св. Літургія, а пак пройде концерт духовной пісні. В тым році орґанізаторы зрыхтували тіж специяльну мобільну аплікацию, в котрій находит ся комплетный проґрам фестівалю в русиньскым, словацкым і польскым языках, мапа обшыри, контакт до орґанізацийного тіму і важны оголошыня, як і можливіст пересланя орґанізаторам рецензиі. Дрібниці найдете на фейсбуковым сайті Русиньска Ватра.

Поломництво на Святу Гору Явір

Уж заран выйде піше православне поломництво на Святу Гору Явір, де в найблизшу неділю православны Лемкы будут празднувати ден святых апостолів Петра і Павла. В тым році одзначена буде тіж 100. річниця повороту Лемків до православія. 36. піше поломництво тым разом буде вело путьом Повороту Лемків до Православія – од Тылявы через Святкову Велику, Свіржову Руску, Бортне, Баницю, Вірхню, Ґладышів, Смерековец, Квятон, Шквіртне, Ганчову і Высову. В передден свята – в суботу – в Ганчовій будут ся правити вечырні богослужыня. В ден святя, в неділю 12. липця/юлия поломникы перейдут до Высовы – при церкви св. Архістратига Михала привитаны будут єрархы. Пак вшыткы вірны выйдут вєдно на Святу Гору Явір, де о 10.00 год. буде правлена Свята Літургія.

Рыхтуєме ся до 46. Лемківской Ватры на Чужыні

Припоминаме, што в днях 31. липця/юлия – 2. серпня/авґуста пройде 46. Лемківска Ватра на Чужыні в Михалові. Заохочаме слідити маркетінґову кампанію подіі, яка проводит ся в сіти Фейсбук і в Інстаґрамі. Орґанізаторы – Стоваришыня Лемків – оприлюднили уж ціны білетів на тогорічну Ватру. Ціна нормального білету то 50 зл на два дни, а білет зо знижком то 40 зл. Очывидно є більше катеґорий, в тым тіж родинны ци ґруповы білеты. В рамках специяльной пропомоцийной оферты мож придбати нормальным білет враз з двотомовым Контекстуальным словником лемківского языка в ціні 230 зл. Неодолга має выстартувати продаж онляйн, де ціны вступного мают быти низшы, як ціны в касах Ватры в дни єй одкрытя.

Выстава творчости Лавры Дичко

Од 11. липця/юлия до 31. cерпня/авґуста в грекокатолицкiй церкви свв. Космы i Даміяна в Бортным i Мазярскiй Загородi в Лоси буде мож обзерати выставу Лавры Дичко пн. «Гафтуване по свойому». Вернісаж одбуде ся в суботу, 11. липця/юлия о 15.00 год. в церкви в Бортным. Выстава представлят ґрафіку і тифлоґрафіку – працы приготовлены так, жебы могли быти приниманы не лем зором, але тіж дотыком. Артистка бере інспірациі з традицийного лемківского орнаменту і вышыванкы, творячы сучасны інтерпретациі народной штукы. Експозициi презентуваны будут в Бортным i в Лоси – двох мiсцях сильно звязаных з лемквiском культуром. В каждым з них вказаны будут iнчы працы артисткы, разом творят они єдно оповiданя о гафтi, памяти i традициi.