Сумар дня на 9. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 9. вересня/септембра 2022 р.

Посол СП хоче провіряти чысло хоснуючый німецкій меншыновый язык

Як поінформувала «Ґазета Выборча», посол Солідарной Польщы Януш Ковальскій заповіл, же зверне ся до Міністерства Внутрішніх Справ і Адміністрациі, жебы провірило, ци в ґмінах в опольскым воєвідстві, в котрых німецкій язык єст хоснуваный як помічный, реально 20% жытелів ідентифікує ся з німецком меншыном. Подля закону о нацийональных меншынах, язык меншыны як помічный може быти хоснуваный в ґмінах, в котрых 20% жытелів деклярує приналежніст до даной меншыны і хоснує меншыновый язык. Тыкат то м.ін. двоязычных таблиц з назвами місцевости і інформаций о уряді ґміны. Посол Ковальскій подає, же іде му о провіріня, ци помічный німецкій язык в опольскым воєвідстві єст хоснуваный згідно з правом, тє. законом о нацийональных меншынах, на основі даных з повселюдного списуваня проведеного в 2021 р. Припомнийме, же чысла звязаны з меншынами з найновшого списуваня, якє проходило влони, не были іщы опубликуваны. Актуально в офіцияльным урядовым списі єст 27 опольскых ґмін, де німецкій язык єст хоснуваный як помічный. Двоязычны таблиці находят ся в около 50 місцевостях. В минулым році посол Ковальскій так само жадал усунути двоязычны польско-німецкы таблиці з двох желізницьовых стаций в опольскым воєвідстві, постулят был єднак узнаный за безосновный.

Ґрупа Приятелів Меншын зачало спілпрацу з Асоцияцийом про Баданя Нацийональности

Ґрупа Приятелів Меншын (SPMN) в Нацийональній Раді Словацкой Республикы розшырює свою діяльніст о медженародну спілпрацу з Асоцияцийом про Баданя Нацийональности (Association for the Study of Nationalities, ASN). За Ґрупом Приятелів Меншын, з причыны абсенциі меншыновой партиі в парляменті бракує фахового погляду на леґіслятивны пропозициі з боку меншын. За єдным з основателів ґрупы, Абельом Равасом, SPMN основали з цілю укріпліня якости творіня законів з досягом на меншыны. Залучыня до спілпрацы ASN мало бы розшырити діяня Ґрупы о медженародну добру практику і інспірувати дискусию на Словациі з найліпшыма ідеями з ічных части світа. В рамках спілпрацы фаховці з SPMN і ASN мали бы дискутувати веце ключовых тем в обшыри меншыновых прав. Перша така дискуция прошла в минулу середу, 7. вересня/септембра, в Братиславі.

Выремонтуют дорогу з Высовой до Бліхнаркы

Ґміна Ґорлиці выремонтує дорогу з Высовой до Бліхнаркы. На тоту ціль ґміна отримала понад піл млн злотых з загальной резервы буджету державы. Цілковитый кошт перебудовы одтинка повітовой дорогы 1498K єст рахуваный на нецілы 2 млн 400 тис. злотых. Цілю інвестициі єст запевнити властивый технічный стан дороговой інфраструктуры і поправа безпекы. В рамках задачы мал бы быти положеный асфальт, зміцнена конструкция дорогы, зроблене побоча і ровы, замонтуваны охоронны барєры і выремонтуваный перепуст під дорогом. За воєводом Лукашом Кмітом, повітова дорога 1498K має стратеґічне значыня так для транспорту дровна з околичных лісів, як і туристичного руху. Іде через місцевости знаны з туристичных атракций і лучыт меншы часто одвиджаны туристами. Для дакотрых єст єдином дорогом доізду до державной дорогы 28 і дале до Ґорлиц.

XI Етноґрафічный Роверовый Райд Слідами проф. Романа Райнфуса

Уж в тоту неділю, 11. вересня/септембра, одбуде ся шторічный роверовый райд, на якій просит Музей Дворы Карвациянів і Ґладышів в Ґорлицях, одділіня Скансен Погіряньского Села в Шымбарку. Участникы XI Етноґрафічного Роверового Райду Слідами проф. Романа Райнфуса мают до выбору 4 трасы, о ріжній долгости і рівни трудности. Найдолша та найтруднійша траса веде через лемківскы села – зачынат ся в Ганчовій і іде м.ін. через Высову, Бліхнарку, Реґєтів, Новицю ци Білянку.