Свідник выдав ку юбілею поштовы карткы

Із нагоды 665-ой річніці першого писомного документу о місті Свідник із цільом підпоры турізму свідницька радніця выдала поштовы карткы. Подля говоркыні міста Крістіны Тхіровой апелують на жытелів, жебы їх подаровали і людей із цілой Словакії тым мотівовали на вылет за історійов і културов в краї під Дукльов. Інформовала о тім аґентура TASR.

Свідник і околіця понукать за словами Тхіровой можливость іти по слідах воєньской історії. „Люди можуть вернути ся до минулости навщівов сканзену над містом і дожычіти собі выгляд з хмар летадлом зо свідниьцкого аеропорту,“ інформовала говоркыня з тым, же якраз тоты три темы суть мотівом серії поштовых карток.

Край під Дукльов

Автором споминаной серії є містный аматерьскый фотоґраф Душан Іґнац, котрый захопив аеропорт, памятник совітьской армії, памятник армадного ґенерала Людвіка Свободы, сканзен і церьков у сканзені.

„Красный край у Выходных Карпатах называме з любвпв край під Дукльов і тото споїня стало і сімболом нашых поштовых карток на пропаґацію краю почас наблизшых вакаційных тыжднів,“ повіла пріматорка міста Марцела Іванчова.

Серійов поштовых карток, за словами пріматоркы, реаґує місто і на сітуацію в „покороновім“ періоді і звекшеный інтерес о вакації ці вылеты на теріторії Словакії. Проєкт є підпореный і білтеном з уквартельованьом, стравованьом і вольным часом в реґіоні, котрый быв выданый іщі в минувшім році.

Хто властно святкує?

Свідник як го знаме днесь выникнув аж у 1944-ім році. Значіть, хто властно святкує 665-ту річніцю першого писомного документу?

Свідник выникнув адміністратівным злучіньом двох русиньскых сел – Вышнього Свідника і Нижнього Свідника. Покля о Нижнім Свіднику ся першый раз пише аж на початку 15-го столітя, Вышній Свідник під назвов Scyuidnik можеме найти в документі Яґерьской капітулы з 28-го юна 1355-го року. Од того часу минать тот рік споминаных 665 років.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫК