Святоуспеньскый одпуст одсвятковали в селі Чірч

Почас вікенду 24-го і 25-го авґуста 2024-го року у Ґрекокатолицькій парохії Чірч на Маріяньскій горі одбыв ся одпуст з нагоды праздника Успенія Пресвятой Богородіці, інформовав отець Йоан Варґа про Інформачный центер Пряшівской архієпархії.

Проґрам почав у суботу процесійов од храму, посвячіньом воды при жрідлі, молитвов ружанця і великов вечурньов із літійов, в рамках котрой поклала ся плащаніця Пресвятой Богородіці до гробу.

Завершіньом суботняйшого дня была торжественна архієрейска літурґія, котрой головным служытельом быв Высокопреосвященый Йона Максим, пряшівскый архієпіскоп і митрополіта. По літурґії наслідовала панахіда за отця Мірона Подгаєцького, котрый вызначно записав ся до історії той парохії, а має там і свій музей.

В неділю головну літурґію одслужыв архімандріта Марко Дурлак, протосінкел Пряшівской архієпархії, кедьже кір Йона быв у тот день на одпусті в Довгім Кылчові, де ся святковала сторічніця храму.

Одпусты в селі Чірч суть повязаны із діями в році 1898, о котрых у парохіалній кроніці отець Мірон Подгаєцькый написав:

„Двом чірчскым дівкам, котры пасли коровы під Углисками, появив ся якыйсь старець, котрый їм дав вопрос, ці бы не хотіли, жебы ту приходило вельо людей на одпусты. По згоді дівок старець запхав паліцю до землі і на тім місці вытріскло жрідло воды із лічівыма силами. Старець жадав, жебы там была збудована каплічка.“

Коли дівчата в селі повіли, што ся їм стало, стрітили ся із непорозуміньом. Од того часу в селі были погромы, котры завершыли ся великыма зливами. Аж по них село вырішыло збудовати на місці зъявліня каплічку, котру присвятили Успенію Пресвятой Богородіці. Люди почали там приходити і одбыло ся там веце чудесных выздоровлінь. Пак там люди збудовали іщі єдну каплічку.

У 1973-ім році была до інтерьєру каплічкы наіншталована ікона од майстра Крижановского, і каплічку втогды наново высвятив пряшівскый помічный єпіскоп, священомученик Василь Гопко.

Фото: Лукаш Колцун