У Свіднику одкрыли інформачный центер Europe Direct

У віторок 12-го мая 2026-го року одкрыли у Свіднику новый інформачный центер Europe Direct, котрый має служыти як пункт контакту меджі жытелями піддукляньского реґіону і інштітуціями Европской унії. Інформує о тім аґентура TASR.

Центер выникнув під покровительство Конфедерації профсоюзів Словацькой републікы, і належыть до сіті десятьох новых центрів Europe Direct на Словакії.

На святочнім одкрытю брали участь представителька Канцеларії Европского парламенту Наталіе Щастна, пріматорка Свідника Марцела Іванчова, і ведучій Одділіня комунікації Представительства Европской комісії на Словакії Петер Жапка.

Презідентка Конфедерації профсоюзів Словацькой републікы Моніка Углерова при одкрытю повіла, же профсоюзы діють на цілій Словакії, но посередництвом нового центра хотять укріпити перепоїня соціалных і робочоправных тем із реґіоном северовыходной Словакії.

То, же выбрали Свідник, за їй словами є повязане із тым фактом, же реґіон має довгодобы соціалны і економічны проблемы.

Задачов центра є давати інформації о Европскій унії, творити простор на діскусію о европскых темах і орґанізовати освітні актівности про школы і жытелів. Меджі головны пріоріты центра належыть підпора діалоґу із гражданами, підниманя свідомости о правах гражданів, безпеці, охрані жывотного оточіня ці діґіталній трансформації.

Почас рока планує центер пририхтовати шість реґіоналных подій. Актівности хоче реалізовати у співпраці із Конфедераційов профсоюзів Словацькой републікы, Европсков профсоюзнов конфедераційов і Европскым господарьскым і соціалным комітетом.

Europe Direct суть містны контактны центры, котры подавають інформації і одповідають на вшыткы вопросы о европскых ділах. Одповідають на них особно, із оглядом на містны обставины. Школованы робітници орґанізують події на школах, діскусії із містныма і реґіоналныма політіками, репрезентують Европу на велеторгах, і надвязують контакты із жытелями. На основі веце як міліона вопросів за рік мають пак европскы чіновникы можливость познати потребы і обавы гражданів.