Учытель наступці австрийского престола…

22 квітна выпадат 118. річниця смерти о. Юлияна Пелеша родом зо Смереківця (деякы біоґрафы подают Бортне).

О. Юлиян Пелеш вродил ся 1843 рока, был священником, вченым і діячом. Вчыл ся в Яслі, Пряшові, Перемышли, богословія кінчыл в семінариі св. Варвары (“Барбареум”) во Відни, студиювал тіж на Віденьскым Університеті, де отримал званя доктора богословія. Был домашнім учытельом наступці австрийского престола, архікназя Рудольфя, ректором , префектом перемышльской та львівской семінариі. 1885 рока покликано го на єпископску кафедру в Станіславові, од 1891 рока до смерти рядил  перемышльском єпархійом. Вславил ся як оборонця східнього обряду на Львівскым Провінциональным Синоді (1881 р.). Лишыл по собі значучий науковий доробок.