Голосник

Уповномоченый про меншыны має за собов далшы робочі стрічі. Планы суть і з ОСРС

Уповномочнеый влады Словацькой републікы про народностны меншыны Ласло Буковскый має за собов далшы робочі стрічі. Інформовав о них на своїм офіціалнім фанпейджі на сіті Facebook.

В четверь 13-го авґуста 2020-го року ся стрітив на Міністерстві внутрішніх справ Словацькой републікы з директором особного уряду Михалом Марком. „Од осени будеме продовжовати в языковій компетенчній освіті робітників выбраных окресных урядів в мадярьскім і русиньскім языку.

В порівнаню з минувшым роком хочеме запоїти до навчалного процесу окрім фаховых робітників і такзваных супервізорів у окремых кліентьксых центрах,“ інформовав Ласло Буковскый.

Status quo на резорті културы

В тот самый день уповномоченый абсолвовав далше їднаня з міністерков културы Наталійов Мілановов і державным секретарьом резорту Радославом Куташом. Стріча, котра за словами Буковского была конштруктівна, дотуляла ся інштітуціоналного забезпечіня меншыновой културы в рамках резорту.

На остатнім засіданю Выбору про народностны меншыны і етнічны ґрупы, котре одбыло ся 28-го юла, была одкрыта тема реорґанізації на Міністерстві културы Словацькой републікы, котра ся дотулять і інштітуціоналного забезпечіня културы народностных меншын. Членове выбору втогды выразили обавы повязаны з тыма змінами і пожадали в узнесіню одповідне інштітуціоналне забезпечіня в рамках орґанізачной штруктуры міністерства, котре бы не огрожовало меншынову културу.

Буковскый по їднаню з представителями резорту културы інформовав, же захованя status quo, і кедь дійде ку орґанізачній зміні, є сполочным цільом.

Рада RTVS і планы з ОСРС

На меншыновім выборі, котрого председом є Буковскый, реґуларно одкрывать ся і вопрос высыланя про народностны меншыны в рамках верейноправного телерозгласу – RTVS.

Уповномоченый зато зорґанізовав засіданя Рады RTVS ку народностному высыланю. Тото засіданя буде прохидити 20-го авґуста і участь на ній будуть мати окрім Буковского і представителі мадярьской, ромской, русиньской і україньской народностной меншыны. За русиньску меншыну буде брати на стрічі участь Петро Медвідь.

Іщі перед четверьговым засіданьом ся має Буковскый вєдно із председом Округлого стола Русинів Словеньска Петром Штефаняком стрітити в понедільок 17-го авґуста з директором Польского інштітуту в Братіславі Яцеком Ґаєвскым.

Бісіда буде о зорґанізованю Biblioteca Minorita – 1-го річника бєнале, переглядкы на Словакії выданой літературы в меншыновых языках, котрой головныма орґанізаторами бы мали быти Уряд уповномоченого влады про народностны меншыны, Округлый стіл Русинів Словеньска і Польскый інштітут в Братіславі.

1-ый річник бєнале бы ся мав зорґанізовати іщі перед переписом населіня і мав бы быти єднов з актівностей, котра буде помагати кампані перед переписом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі