Голосник

Уповномоченый про меншыны у міністра школства

В середу 17-го юна 2020-го року уповномоченый влады Словацькой републікы Ласло Буковскый продовжовав у робочіх стрічах з членами новой влады приятьом у міністра школства Браніслава Ґрылінґа.

Буковскый уж в маї абсолвовав робочі стрічі з міністерков справодливости Марійов Коликовов, і міністерков културы Наталійов Мілановов. О їднанях на резорті школства інформовав офіціалный сайт його уряду.

За участи державной секретарькы Міністерства школства, наукы, баданя і шпорту Монікы Філіповой, і ґенералной директоркы Секції народностной і інклузівной освіты Монікы Ґайдачовой, было за інформаціями сайту продіскутованых веце тем, котры дотуляють ся выховы і освіты дітей – членів народностных меншын, і взаємной співпраці.

Філіпова, котра кандідовала у выборах на списку партії Sloboda a Solidarita, была і співавторков части партійного проґраму, яка занимала ся політіков односно народностных меншын. Части того проґраму дістали ся і до Проґрамового выголошіня влады Словацькой републікы, в котрім ся конкретно споминать і русиньске школство.

Участны ся на стрічі договорили передовшыткым на співпраці при повніню конкретных задач, котры з Проґрамового выголошіня выходять, наприклад творіня закона о народностнім школстві і закона о поставліню народностных меншын, але і з Акчного плану охороны прав особ, котры належать ку народностным меншынам і етнічным ґрупам.

Буковскый звернув увагу і на проблему при становльованю кількости школярів першых клас при меншыновых середніх фаховых школах і ґімназіях. На другім боці підкреслив важность приятя леґіслатівных рішінь народностного школства, як ї досягнены успіхы.

„Вітам конштруктівного і одкрытого духа, в котрім робоча стріча проходила і вірю, же ся сотворив простор про єфектівну співпрацу при повніню сполочных цілів,“ повів по робочій стрічі уповномоченый Буковскый.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі