Уповномоченый стрітив ся з премєром і секретарьом резорту културы

Уповномоченый влады Словацькой републікы про народностны меншыны Ласло Буковскый минувшый тыждень абсолвовав далшы стрічі з представителями новой влады.

У четверь 9-го юла 2020-го року стрітив ся з премєром Іґором Матовічом, о день пізніше із державным секретарьом Міністерства културы Словацькой републікы Владиміром Долінайом.

Треба меншыновый закон

„Правдоподобно многых із вас інтересує, як довго іщі зістану на своїй посаді, кедьже єм быв выменованый за попередньой владной коаліції. Ани по стрічі з паном премєром Матовічом не знам на тот вопрос одоповідь,“ написав на своїм офіціалнім фанпейджі на сіті Facebook Буковскый по стрічі з Матовічом.

Як далше інформовав, з премєром наперек тому вели конштруктівну діскусію о компетенціях уповномоченого, о меншыновых правах і леґіслатівных замірах влады. Подля Буковского ся на стрічі згодли на тім, же Словакії треба меншыновый закон, котрый буде управльовати і інштітуціоналне забезпечіня меншыновых прав, што значіть, же ся вытворить новый уряд – „міністерство про меншыны“.

На стірчі бісідовало ся і о переписі населіня, котре буде на Словакії у 2021-ім році, што має про меншыны величезне значіня. Буковскый премєрови в повязаню з тым запропоновав, жебы послав позітівный сіґнал про меншыны, в котрім бы ся высловив за толерантну Словакію, в котрій ся меншыны не мусять бояти признати свою ідентіту.

Співпраца з резортом културы

В пятніцю 10-го юла запрошіня на Уряд уповномоченого влады Словацькой републікы про народностны меншыны прияв державный секретарь Міністерства културы Владимір Долінай.

Долінай быв за державного секретаря выменованый зачатком юна, но з уповномоченым ся знають довше, кедьже тісно співпрацовали в рамках різных форумів, а і на засіанях Выбору про народностны меншыны, на котры Долінай ходив.

Новый державный секретарь одповідать на Міністерстві културы за область меншыновой културы, зато темов стрічі было проїднаня різных форм културных проґрамів і дотацій і їх ефектівніше наставліня. Обидвоми ся згодли на тім, же дакотры механізмы підпоры про меншыны бы ся мали выліпшыти і мали бы быти простішы.

І на тій стрічі Буковскый одкрыв тему слідуючого препису населіня. В повязаню з тым пожадав резорт културы о підпору трьох конкретных планованых подій, котры будуть присвячати ся літературній творчости, історії і народній културі народностных меншын.

Як інфомровав офіціалный сайт уповномоченого, державный секретарь выразив пересвідчіня, же міністерство в тій темі буде одкрыте про співпрацу і є пересвідченый, же ся подарить зорґанізовати сполочны події на пропаґацію културной і языковой розмаїтости Словакії. На стрічі были так само обговорены і впросы языковых прав і народностных музеїв.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА