В Чертіжнім одкрыли обновленый Цінтерь русиньскых особностей

В неділю 12-го мая 2024-го року в селі Чертіжне, Меджілабірьского окресу, одбыла ся торжественна подія. Ґрекокатолицька парохія святковала храмовый праздник Вознесенія Господа, на котрій брав участь Высокопреосвященый Йона Максим, пряшівскый архієпіскоп і митрополіта.

По торжественній літурґії в містній церькви участны ішли на цінтерь, котрый є коло храму. На цінтері є похованых дакілько вызначных русиньскых особностей, і так ся в остатнім часі робила ревіталізація його части, жебы святочно одкрыти Цінтерь русиньскых особностей села Чертіжне.

На цінтері мож найти гробы Адолфа Добряньского, Михаіла Бескида, Юліа Ставровского-Попрадова, Іринея Ханата, але і далшых. Добряньскый має на цінтері і деревяну скулптуру.

Участным приговорив ся адміністратор парохії отець Душан Храпчак, котрый спомянув річніці там похованых особностей. Приговор мав і отець Мілан Ясик, член Общества святого Йоана Крестителя і парох в Ольці, котрый говорив о Адолфови Добряньскім і капчанями, котрыма спаять своїх сучасників, як і Русинів днесь.

На недільній події приговорив ся далше староста села Петро Трічак, як і Володимір Противняк, председа Містной орґанізації Русиньской оброды на Словеньску. По приговорах наслідовало одкрытя орьєнтачной табліці, а торжество закінчіло ся молитвов панахіды, котру вів кір Йона.

Реконштрукцію цінтеря вєдно із селом реалізовала Містна орґанізація Русиньской оброды на Словеньску в Меджілабірцях і Ґрекокатолицька парохія Чертіжне. Проєкт, в рамках котрого прибыли і інформачны написы в русиньскім языку, підпорило Міністерство інвестіцій, реґіоналного розвитку і інформатізації Словацькой републікы.

Проєкт міністерство підпорило сумов 20 тісяч евр, село Черзіжне дало властный вклад далшых 5 тісяч евр.

Адолф Добряньскый од 1867-го до 1881-го року жыв у Чертіжнім. Одкупив там великостаток і з курійов. І кедь вмер у Іннсбруці, практічно у выгнанстві, поховали го в Черзіжнім. Курія Добряньского выгоріла почас Першой світовой войны.