Село Чірч в окресі Стара Любовня ся пустило од обновліня історічной деревяной хыжы. Майже сто років стара деревяна будова перейде великов реконштрукційов. Як інформовав пресаґентуру TASR староста Михал Дідік, мала бы в ній выникнути памятна ізба.
Чірч на проєкт здобыв 70 тісяч евр. Жебы село моглло жадати о дотацію на фінанцованя проєкту з европскых жрідел, мусило здобыти деревяну хыжу до свого маєтку.
„Ословили сьме маїтеля і пояснили му наш замір, же хочеме деревяну хыжу зреконштруовати і выбудовати в ній памятну ізбу. Маїтель быв согласный і мы могли зачати з приготовліньом проєкту на обнову хыжы,“ повів Дідік. Додав, же думка обновы старой хыжы зродила ся меджі жытелями села, котры єй хотіли сохранити.
Роботы на обнові реалізують робітници сельской фірмы Солиско Чірч, котры поступно вымінять стару стріху за нову з деревяного шындля. Мінити ся буде і підлога ці перегородкы, котры роками пошкодила спідня вода. Староста підкреслив, же вшытко ся робить в згоді з одказом предків. Кедьже іде о історічну будову, ку обновліню село жадало і выражіня памяткового уряду в Пряшові.
В памятній ізбі, котра по закінчіню реконштрукції выникне, буде часть експонатів творити автентічне выбавліня і часть буде походити із пріватных збірок жытелів села.
Покля в Чірчі в рамках мікропроєкту Мушына – Чірч, сохраньме перед забытьом културу нашых предків обновлять деревяну хыжу, на польскім боці зреконштрують храм.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі