В Пряшові одбыв ся сейм РОС

В суботу 20-го фебруара 2016-го року в Пряшові, в просторах Театру Александра Духновіча, проходив 13-тый міморядный сейм Русиньской оброды на Словенську (РОС) – найстаршой і найвекшой русиньской орґанізації на Словакії по 1989-ім році. Сейм проходив із причіны абдікації бывшого председы РОС Мілана Мнягончака зо дня 2-го новембра 2015-го року. Мнягончак абдіковав зо здравотных причін.

Подля втогды платных станов мав быти сейм скликаный до 30-ох днів од абдікації председы. Кідьже ішло о час, коли требало закінчіти проєкты за 2015-тый рік і написати новы проєкты на рік 2016, Коордіначный выбор РОС схвалив пересунутя терміну сейму на 20-тый фебруар 2016. До того часу быв повіреным штатутарьом орґанізації підпредседа Мартін Караш, котрый мав підписове право. На сейм было номінованых 39 делеґатів із 21 Містных орґанізацій РОС. Сейм конштатовав, же мав стопроцентну участь делеґатів.

В першій части сейму, котру вела Анна Кузмякова, делеґаты выслухали інформацію Выконного выбору о діятельстві орґанізації од остатнього сейму, котрый проходив в маї 2014-го року. Так само председкыня Дозорной рады РОС Вєра Юрічова інформовала о господаріню РОС за остатній період од сейму. Друга часть была заміряна на выбераня новых орґанів орґанізації і на зміну станов. Так само делеґаты діскутовали о проґрамовых пропозіціях і цілях на новый міджісеймовый період в рр. 2016 – 2019.

На функцію председы кандідовав лем єден кандідат – Мартін Караш. Тот здобыв надполовічну векшыну голосів потрібных про зволіня, і став ся новым председом РОС. Делеґаты выберали і новый Выконный выбор і Дозорну раду. До нового Выконного выбору окрім председы были зволены: Крістіан Гуняра, Штефан Шалап, Владимір Противняк, Ярослав Фецуш, Петро Мікула, Мілан Щіґулиньскый і Теодозія Латтова. Латтова як єдина зо вшыткых зволеных новых орґанів орґанізації здобыла повный рахунок голосів од делеґатів – 39. В складі новой Дозорной рады суть по сеймі: Анна Кузмякова, Вєра Юрічова, Владимір Бейда, Мирон Крайковіч і Йозеф Мачуґа. Орґаны были звоелны на трирічный період.

Делеґаты сейму рішыли і новы управы в становах РОС. Міморядный сейм є по новому потрібне скликати до 90-ох днів. Центер орґанізації ся подля новых станов вертать назад до Пряшова. По остатнім сеймі, котрый проходив в Міджілабірцях у 2014-ім році, быв центер РОС в Гуменнім.

РОС рішала і своє одношіня ку Округлому столу Русинів Словеньска (ОСРС). Делеґаты голосовали за то, жебы РОС была членом – позоровательом в ОСРС і представителі РОС будуть ходити на засіданя ОСРС. Участны не вылучіли, же в будучности буде орґанізація жадати о рядне членьство в ОСРС.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА