В Пряшові одсвятковали 15 років метрополії

В суботу 28-го януара собі духовны і віруючі в Катедралнім соборі святого Йоана Крестителя в Пряшові припомянули 15-ту річніцю реорґанізації Ґрекокатолицькой церькви на Словакії, коли стала метрополітнов церьквов sui iuris.

Торжественну архієрейску літурґію з той нагоды одслужыв владыка Петро Руснак, апостольскый адміністратор sede vacante Пряшівской архієпархії а єдночасно братіславскый єпарха. Проповідав на літурґії Монс. Нікола Джірасолі, апостольскый нунцій на Словакії.

Святкованя почали уж в пятніцю 27-го фебруара, коли на Ґрекокатолицькій теолоґічній факулті Пряшівской універзіты одбыла ся научна конференція з меджінароднов участьов, яка была присвячена споминаній річніці.

Участных коло двадцять єпіскопів

На суботнім торжестві брало участь коло двадцять єпіскопів ґрекокатолицькых і римокатолицькых, котры были із Словакії, але і споза граніць.

На браковали представителі найблизшых про метрополію на Словакії церьковных штруктур як владыка Ніл Лущак, апостольскый адміністратор Мукачовской єпархії, владыкове Філіп Кочіш, Атаназ Орос і Авел Сочка з Мадярьской метрополії, владыка Ґеорґій Джуджар руськокерестурьской єпархії ці владыка Мілан Стіпіч, котрый є крижевацькым єпархом.

Участны были і представителі штатной справы і самосправы із Словакії а Мадярьска, представителі академічной общіны, множество священиків, монахів і монашок.

Велика мета і новый зачаток

Як інформовав Михал Павлишіновіч із Інформачного центра Пряшівской архієпархії, апостольскый нунцій Нікола Джірасолі высловив у проповіді велику радость з того, же може як заступник Святішого Отця Франціска быти участным на торжестві.

Выголошіня Ґрекокатолицькой церькви на Словакії за метрополію перед 15-ма роками означів за велику мету, але і новый зачаток про містну церьков. Припомянув і довгу путь терпіня Ґрекокатолицькой церькви на Словакії, котра все заховала вірность, а окремо почас довгого періоду реліґійной неслободы, коли многы віруючі пережывали великы страсти і тверды переслідованя аж по мученицьтво.

„В імени Святішого отця Франціска, котрого покорно заступам на Словакії, вам знова повторям: дякую. Папа Франціск є гордым на вас вшыткых, на способ, якым собі сохраняте, жыєте і оголошате віру,“ повів у проповіді нунцій.

На кінцю торжества было прочітане і поздравне писмо, котре з події загнали Вселеньскому Архієрейови. Нунцій передав владыкови Руснакови медайлу Святішого Отця зо словами, же вшыткы віруючі заслужать собі єднаку медайлу, обдив і вдяку за то, з яков вірностьов і запалом сохраняють і передавають віру далшым ґенераціям.

Ани сокрыры комунізму єй не розтяли

На події приговорив ся і Бернард Бобер, кошыцькый римокатолицькый архієпіскоп і метрополіта а председа Конференції єпіскопів Словакії. „Ани остры сокыры комунізму єй не розтяли,“ повів на марґо Ґрекокатолицькой церькви метрополіта.

Участным приговорив ся і єпіскоп Выходного діштрікту Євангелицькой церькви ауґсбурзького віроісповіданя Петер Мігоч, котрый підкреслив, же за пятьнадцять років метрополії видить, як ся Ґрекокатолицька церьков рушала допереду і як ся розвивать.

Святкованя продовжовали далшы два дні

В неділю 29-го януара святкованя продовжовали в Кошыцях. В Катедралнім соборі Рождества Пресвятой Богородіці торжественнов архієрейсков літурґіов дяковало ся за 15 років од выголошіня Кошыцького екзархату за єпархію.

Головным служытельом быв кошыцькый єпарха архієпіскоп Кіріл Василь, вєдно з ним служыли і апостольскый нунцій Нікола Джірасолі, владыка Петро Руснак, владыка Атаназ Орос, владыка Маріян Андрій Пацак і далшы. Проповідь на торжественній літурґії мав владыка Петро Руснак.

Проґрам святковань закінчів ся в понедільок 30-го януара. В тот день была одслужена літурґія в ґреческім языку, котру в пряшівскім Катедралнім соборі святого Йоана Крестителя одслужыв владыка Мануел Нін, апостольскый екзарха Ґреції.

Пряшівска метрополія

Ґрекокатолицьку церьков на Словакії за метрополітну церьков sui iuris із центром в Пряшові выголосив Папа римскый Венедікт XVI. 30-го януара 2008-го року. Пряшівскій єпархії тым підняв статус на архієпархію, Кошыцькый апостольскый екзархат став Кошыцьков єпархійов, а вєдно з тым была еріґована Братіславска єпархія.

Ґрекокатолицька церьков на Словакії має за остатнім списованьом жытелів із 2021-го року 218 235 віруючіх. Чісло вірників в періоді меджі двома списованями наросло о 11 364 людей. В Пряшівскій архієпархії жыє 114 401 віруючіх, Кошыцька єпархія має 74 240 віруючіх, і в Братіславскій єпархії ся ку ґрекокатоликам приголосило 29 594 віруючіх.

Єпіскопат Ґрекокатолицькой метрополітной церькви на Словакії творить пять єпіскопів: владыка Петро Руснак, братіславскый єпарха і аспостольскый адміністратор Пряшівской архієпархії, владкыа Кіріл Василь, кошыцькый єпарха, владыка Мілан Лах, помічный єпіскоп Братіславской єпархії, владыка Йоан Бабяк, емерітный пряшівскый архієпіскоп і метрополіта а владыка Мілан Хаутур, емерітный кошыцькый єпарха. В монастырю отців редемпторістів у Старій Любовні іщі жыє владыка Маріян Андрій Пацак, емерітный єпарха торонтьскый.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА